فارياب ولايتي شورا: د دولتي ځواکونو د هوان مرمۍ لګېدو ۱۳ ولسي وګړي وژلي
(کابل ټکی کام ۱۳۹۶زمری ۲۱)
د فارياب ولايت په دولت اباد ولسوالۍ کې د دولتي ځواکونود هوان مرمۍ د لګېدو له امله د ښځو او ماشومانو په ګډون ۱۶ کسانو ته مرګ ژوبله اوښتې ده.
د دغه ولسوالۍ امنيه قوماندان سمونوال نعمت الله توفان وايي، چې يادو ولسي خلکو ته د تورته عطا په سيمه کې د هوان مرمۍ د لګېدو له امله دغه مرګ ژوبله رسېدلې ده.
نوموړی وايي، چې دولتي ځواکونو د جمجمه کلا په سیمه کې پوسته جوړوله چې د طالبانو او عسکرو تر منځ نښته رامنځته شوه، خو به خبره يې چې تر اوسه معلومه نه ده چې دا هوان د کوم لوري راغلی دی.
له بله پلوه د فارياب د ولايتي شورا مرستيال عبدالاحد ايلبيک وايي، چې د پېښې قربانيان تول ملکي وګړي دي او په خبره يې چې د دولتي ځواکونو د شپاړلسم نمبر پوستې څخه د هوان مرمۍ توغول شوې او ياده مرګ ژوبله يې اړولې ده.
د يادې ولسوالۍ روغتيايي مسئولين وايي، چې په پېښه کې د وژل شويو ټولو کسانو مړي سوځېدلي دي.
د سرچينې په وينا، په دغه پېښه کې ټول ۱۳ کسان وژل شوي، چې لس ماشومان، دوې ښخې او يو نارينه دی او زياته کړې يې ده، چې د درېيو ماشومانو او يوې ښځې په ګډون څلور نور مرګوني ټپيان دي، چې د بدن ډېره برخه يې سوځېدلې ده.
ډیری وخت د طالبانو او دولتي ځواکونو تر منځ په جګړو او د امريکايي ځواکونو په هوايي بريدونو کې ولسي وګړو ته د سر درانه زيانونه اوړي، چې تېره ورځ هم د ننګرهار ولايت په اچين ولسوالۍ کې د بهرنيو ځواکونو په بمبارۍ کې ۱۶ تنه ولسي وګړي ووژل شول.
طالبانو پرون وويل، چې نړيوالې بشري ټولنې او سيمه ييزې بشري ادارې پر عامو خلکو د امريکايي او افغان ځواکونو بمباريو ته اهميت نه ورکوي، يا چوپه خوله وي.
د طالبانو وياند ذبيح الله مجاهد وايي، کله چې يادې ادارې د کلني راپور لست ترتيبوي نو بيا ډېر تلفات طالبانو ته منسوبوي او د امريکايي ځواکونو په بمباريو پرده اچوي.
