(کابل ټکی کام ۱۳۹۶زمری ۲۲)
د کندهار ولايت بزګر او کروندګر وايي، چې بهرنيو ځواکونو د دوی پر باغونو او فصلو د هوا له لارې زهري مواد پاشلي دي.
د دغه ولسوالۍ بزګر شکايت کوي، چې د زهري موادو د شيندلو له امله يې سږ کال په حاصلاتو کې ۷۵ سلنه کموالی راغلی دی.
د دوی په وينا، ښايي بهرنيو ځواکونو دغه کړنه د کوکنارو د کښت د له منځه وړولو په موخه ترسره کړې وي.
د پنجوايي اوسېدونکي وايي، چې مخکې هم بهرنيانو دغه ډول زهري مواد پاشلي چې تر ډېره به يې زیان نورو فصلونو او باغونو ته رسېده.
په کندهار کې د نشه يي توکو سره د مبارزې مسئولين دا نه مني چې ګنې بهرنيانو دې زهري مواد پاشلې وي.
په ورته وخت کې د زراعتي چارو کارپوهان وايي، که د کوکنارو سره دغه ډول مبارزه دوام پيدا کړي، ښايي د کندهار زراعت په راتلونکې کې نور زيانونه هم وګالي.
د دوی په خبره، پر هغه ځمکه بايد ځانګړي زهري مواد وپاشل شي، چې يواځې کوکنار پرې کرل شوي وي او داسې مواد وي چې زیان يې نورو فصلونو ته ونه رسېږي.
په افغانستان کې ميشت د بهرنيو ځواکونو مطبوعاتي مسئولينو په دې اړه له معلوماتو ورکولو ډډه کړې.
دا لومړی ځل نه دی چې بهرني ځواکونه په کروندو او فصلونو زهري مواد پاشي، مخکې تر دې د هېواد له بېلابېلو ولايتونو څخه داسې راپورونه ورکول شوي، چې ګنې بهرنيو ځواکونو د خلکو پر کروندو او فصلونو زهري مواد شيندلي، چې نه يواځې کوکنارو ته يې زيان اړولی بلکې ورسره د خلکو نور فصلونه هم زيانمن شوي دي او ډېره برخه يې له منځه تللې ده.
