(کابل ټکی کام ۱۳۹۶ زمری ۲۱ فرید افغان)
څو ورځې وړاندې طالبانو د سرپل ولایت د صیاد ولسوالۍ میرزاولنګ سیمه ونیوه، د رسنیو له قوله چې هلته داعشي ملیشو او طالبانو په شریکه ملکي وګړي وژلي او پراخ انساني جنایت یې کړی، .
داخبر د ټولو رسنیو سرټکی وګرځیده او د ټولنیزو رسنیو له لارې په حکومت فشارونه ډیر شول ترڅو هلته پوځي عملیات پیل کړي، اشرف غني یوه خبري کنفرانس ته په صراحت سره وویل چې د یادې عام وژنې غچ به اخلي.
رسنیو بې له دې چې د ملکي تلفاتو کره شواهد خلکو ته وړاندې کړي یواځې یې په تبلیغاتي خبرونو اکتفاکوله ځینو د سوریې او عراق د وژل شویو ماشومانو تصویرونه هم دې پیښې ته منسوبول.
طالبانو له وړاندې هم داټولې هڅې د دولت د رسنیز تبلیغاتي بانډ پروپاګند بللې او اوس یې یوځل بیا یاده پیښه مطلقاُ رد او د استخباراتي کړیو طرحه شوې دسیسه یې بللې ده.
طالبان وایي ‹‹اسلامي امارت د میرازولنګ په سیمه کې ولسي خلکوته هر ډول مرګ ژوبله په کلکه ردوي، هلته هيڅ عام سړي، ښځې، ماشوم او سپين ږیري ته چا زیان نه دی اړولی.››
طالبانو له افغان ولس غوښتي چې په دې اړه تبلیغاتو ته هيڅ ارزښت ورنکړي، طالبانو ویلي ځینې کړۍ په لوی لاس له دا ډول خبرونو څخه قومي تربګنیو ته لمن وهي ‹‹ دښمنان غواړي په داسې اوازو اچولو سره د هیواد د قومونو او مذاهبو ترمنځ د صمیمیت فضا خرابه کړي او اختلافات پيدا کړي، له اهل تشیع او هزاره قومونو سره د اسلامي امارت مجاهدین تنها په میرازولنګ کې نه دي مخ شوي، بلکې دهیواد په مختلفو مفتوحه سیمو کې خورا ډير اهل تشیع او هزاره قومونه د اسلامي امارت تر تسلط لاندې سیمو کې آرام او سوکاله ژوند لري او هیڅ ستونزه ورته نه ده پيښه شوې همدارنګه دهزارجات داکثرو سیمو لاري زموږ دمجاهدینو تر کنترول لاندی سیمو کی تیریشوی دی او هغوی پري تګ راتګ اوتجارت کوی چي تراوسه هیچاته زموږ دمجاهدینو له لوري تکلیف ندی رسیدلی، همدارنګه د میرزاولنګ سیمي عملیاتو کي داعش له موږ سره ګډون نه درلود. ››
طالبانو له علماؤ، متنفذینو هم غوښتي چې یوطرفه قضاوت ونکړي او باید د دې پیښې په اړه دې لازمې څیړنې وکړي چې تر کومه حده پروپاګند ده
‹‹موږ د اهل تشيع له مشرانو، علماؤو او متنفذینو څخه هم غوښتنه کوو چې د دښمن دسیسوته په پام سره د یادې مسئلې په اړه خورا متوجه واوسي، دقیق معلومات راټول کړي او د هر راز مذهبي بدبينۍ مخه ډب کړي اوپري نږدي چی دکابل لړزانده اداره اوباداران یې په شومو او له حقیقت نه لیری تبلیغاتو دځان په ګټه استعمال کړي او په نظامي سنګرونو کي ناست جنګیالي په ملکي خلکو تعبیرکړی.››
طالبانو په ورته وخت کې رسنۍ مخاطبې کړې چې که واقعا ځان بې طرفه بولي او د مقابل لوري تبلیغاتي بانډ نه وي دله نږدې څخه دې دا پیښه تعقیب کړي.
‹‹اسلامي امارت رسنیو او هغو ادارو ته چې واقعا غواړي د میرازولنګ دسیمې دقیق معلومات ترلاسه اوخپاره کړي بلنه ورکوي چې راشي، موږ سیمې ته د ورتګ زمینه ورته مساعده وو، دوی دې ټولې هغه ادعاوې په پوره بې طرفۍ سره وڅيړې چې د دښمن لخوا دا څو ورځې کیږي او لا روانې دي، ترڅوحقیقت معلوم او زموږ د دین او ولس د دښمنانو دسیسي رسوا شي.››
باید وویل شي چې حکومت اوسمهال په یاده سیمه کې عملیات پیل کړي چې د پرمختګ ادعا هم کوي خو طالبان یې ردوي
