(کابل ټکی کام ۱۳۹۶زمری ۲۲): د متحده عربي امارتو د پوځ سرچينې وايي، چې په یمن کې د دغه هېواد پوځي چورلکه نسکوره شوې، چې په ترڅ کې د اماراتو څلور پوځيان وژل شوي دي.
د سرچينې په وينا، ياده چورلکه د شبوه په ولايت کې د تخنیکي ستونزو له امله نسکوره شوې او د اماراتو څلور پوځيان پکې وژل شوي دي.
که څه هم د سعودي عربستان په مشرۍ عرب ائيتلاف وايي، چې پېښه د تخنيکي ستونزو له امله رامنځته شوې، خو تر اوسه لا معلومه نه ده چې دغه چورلکه ويشتل شوې او که تخنيکي عوارض يې لرل.
د يمن په شبوه ولايت کې د امريکا او عربي اماراتو ګډ ځواکونه د انصارالشريعة ډلې پرضد پر عملياتو بوخت دي.
ځينې يمني سرچينو ويلي، چې ياده چورلکه له نسکورېدو وروسته په مکمله توګه ويجاړه شوې ده.
د ورکړل شويو راپورونو له مخې، د يمن په شبوه ولايت کې له تېرې څه مودې راهيسې امريکايي پوځيان په ځينو مهمو ځايونو کې ميشت شوي دي.
