بلخ: د آصف مومند دوسیه پیچلي پړاو ته داخله شوه

(کابل ټکی کام ۱۳۹۶زمری ۲۴ فرید افغان)

تیر ماښام د بلخ د ولایتي شورا دوه وکیلان او د جمعه خان همدرد یوځوی د بلخ په هوایي ډګر کې له ښکته کیدو سره سم د بلخ د والي د وسلوالو لخوا کلابند شول.
په لمړي سر کې دوی د ملاتړو د نشتون له کبله د عطانور د کسانو له فزیکي برخورد سره مخ شول.
له سختو وهلو ټکولو وروسته د جمعه خان همدرد ملیشو هوایي ډګر ته ځانونه ورسول ترڅو خپل کسان د عطانور له برمتې وژغوري خو د وسلوالو له رسیدوسره سم نښته وشوه.
چې د جمعه خان همدرد ۳۰ وسلوالو د عطانور د ۲۰۰ کسیزې ملیشې تاب را نه ووړ او بیرته وتښتیدل.
د بلخ امنيه قوماندان سيد کمال سادات بي بي سي سره په خبرو کې ويلي چې د تيرې شپې پيښه کې د ولايتي شورا د غړي اصف مومند دوه ساتونکي وژل شوي او درې پوليس ټپيان دي.
د آصف مهمند ورور رسنیو ته ویلي چې په پیښه کې د کورنیو چارو د وزارت له مستقیمې مداخلې وروسته ټاکل شوې وه چې د شپې په ۳۰؛۲ دوه نیمې بجې یې ورور کابل ته منتقل شي.
خو د بلخ د والي کسانو ورباندې ډزې شروع کړې او د نوموړي دوه ساتونکي یې ووژل.
مصطفی مهمند وایي له ډزو وروسته یې د عطانور کسان د ورور په نیولو بریالي شول او د هغه کورکې یې بندي کړ.
د ورور په وینا یې چې اصف مهمند د عطانور اوځامنو لخوا سخت وهل ټکول شوی دی.
نوموړي ویلي چې خپل وژل شوي کسان به ترهغو خاورو ته ونه سپاري ترڅو حکومت د عطانور په اړه پریکړه نه وي کړې.
څو ساعته مخکې د بلخ د ولایتي شورا د غړي آصف مهمند د کورنۍ غړو رسنیو ته وویل چې، نوموړی د عطانور له وهلو ټکولو وروسته ملي امنیت ته سپارل شوی دی.

بلخوا د افغانستان د لويې څارنوالۍ وياند ازادۍ راديو سره خبرو کې ويلي چې د لويې څارنوالۍ د يو مرستيال په مشرۍ يو کمېسون ټاکل شوی چې د کورنيو چارو وزارت غړي، د ملي امنيت رياست او د سيمه ييزو ارګانونو خپلواکه ادارې غړي يې هم عضويت لري، دوی ته امر شوی چې د اصف مومند د نيولو څرنګوالی وڅېړي.
د لويې څارنوالۍ وياند ويلي چې لويې څارنوالۍ د اصف مومند د نيولو امر نه دی ورکړی.

باید وویل شي چې آصف مهمند په عطا محمد نور د پراخ فساد تورونه لګولي وو او هم يې ويلي وو چې عطا محمد نور یې د وژلو یا برمته کولو پلان لري.
شنونکي وایي چې له یوې خوا آصف ننګ په بلخ کې د جنرال عطا دخپلسریو لپاره ستر سرخوږی ؤ، او له بل لوري د عطانور او ارګ خپلمنځي اړیکې ترینګلې وې نوعطا غوښتل له دې طریقه هم خپل مخالفین وځپي او هم ارګ میشتو ته خپل زور ورښکاره کړي.