(کابل ټکی کام ۱۳۹۶ زمری ۲۵ فرید افغان)
د اوبو او انرژۍ وزارت چارواکو ویلي چې د لویو بندونو نړیوال کمیسیون یا (ICOLD) چې مرکز یې په پاریس کې دی د افغانستان غړیتوب تایید کړی.
چارواکو ویلي چې د اوبو د ښه مدیریت، او دځینو بندونو د رغولو له کبله چې په تېرو دوو کلونو کې یې ترسره کړي په دغه کمیسون کې رسمي غړیتوب تر لاسه کړی دی
له دې وروسته دا کمیسیون کولی شي چې په معیاري بڼه دافغانستان د بندونو په رغولو کې فعاله ونډه واخلي.
له همدې کبله د دغه هېواد لپاره د معیاري بندونو جوړولو او اوبو مدیریت په برخو کې د نړیوال کمیسیون غړیتوب ترلاسه کول ډېر مهم بلل کیږي.
شمېرې ښیي چې افغانستان په منځني ډول ۷۰ میلیارد متر معکب کلنۍ اوبه لري، چې ۸۰ سلنه یې ګاونډیو هېوادونو ته ځي.
د اوبو لویو بندونو نړیوال کمیسیون شاوخوا ۸۷ کاله مخکې په پاریس کې جوړ شوی چې دا مهال ۲۵ تخنیکي کمیټې لري
افغان حکومت وایي چې د اوبو د مدیریت او بندونو د جوړولو هڅې یې ګړندۍ کړې چې دې چارې ګاونډي هیوادونه سخت اندیښمن کړي
څه موده وړاندې د ایران ولسمشر حسن روحاني د دغه هېواد پلازمنېه تهران کې د ګرد او باد “ننګونې او حل لار” کانفرنس کې وویل، چې په افغانستان کې د بندونو جوړولو په تړاو بې تفاوته پاتېدلی نه شي.
چې وروسته بیا د نوموړي دې څرګندونو د افغانانو فعالانو توند غبرګون راوپاراو
او د هلمند په ګډون په مختلفو ولایتونو کې د اوبو په ملاتړ مظاهرې وشوې.
افغان حکومت وایي چې د اوبو د بندونو لویي پروژې په پام کې لري خو خلک یې یواځي تبلیغاتي هڅه بولي.
شنونکي وایي د اشرف غني په مشرۍ دګډحکومت اداره پدې توګه هڅه کوي چې د راتلونکو ټاکنو لپاره یوځل بیا خلک د ځان په لوري مایل کړي او خلکو ته د رغنیزو کارونو غوړې ژمنې ورکول یواځي په واک کې دثبات لپاره، مهالنۍ دي
