(کابل ټکی کام ۱۳۹۶زمری ۲۵): امنیتي سرچينې وايي، چې د سرپل ولايت د ميرزاولنګ سيمه له دوو وروځو وروسته يوځل بيا د طالبانو لاسته ولوېده.
يوې امنيتي سرچينې رسنيو ته ويلي، چې وسله والو طالبانو تېره شپه په ميرزاولنګ سيمه کې پر ميشتو دولتي ځواکونو د درنو او سپکو وسلو بريدونه کړي او هغوی يې شاتګ ته اړ کړي دي.
د سرچينې په وينا، دولتي ځواکونو د يادې درې ډیری سيمه خوشې کړې او د وسله والو د سختو بريدونو له امله د شيرم غره سرته ختلي دي.
د طالبانو له لوري کابل ټکی کام ته په رالېږلې خبرپاڼه کې راغلي، چې د دوی وسله والو په ميرزاولنګ کې له دولتي ځواکونو سره جګړه کړې، چې په ترڅ کې يې ياده سيمه په بشپړه توګه نيولې ده.
طالبان وايي، په دې جګړه کې يې دولتي سرتيرو ته مرګ ژوبله اړولې خو د تلفاتو د کره شمېرو په اړه يې معلومات نه دي ورکړي او زياتوي، چې د دوی ځواکونه دمګړۍ په سیمه کې په تصفيوي عملياتو بوخت دي.
په دې اړه تر اوسه دولتي چارواکو رسمي څرګندونې نه دي کړي.
ياده سيمه د روانې مياشتې په ۱۳ نېټه د جګړې په پايله کې وسله والو طالبانو ونيوله، چې لسګونه محلي پوليسو ته پکې مرګ ژوبله واوښته، خو وړمه ورځ دولتي ځواکونه دغې درې ته ننوتل او د دوه ورځو په تېرېدلو سره يې نن يوځل بيا دغه سيمه له لاسه ورکړه.
