(کابل ټکی کام ۱۳۹۶زمری ۲۶): حزب اسلامي د بلخ د ولايتي شورا د غړي اصف مومند دنيولو په غبرګون کې ويلي، که حکومت په دې اړه جدي اقدام ونه کړي، نو دوی به بې تفاوته پاته نه شي.
حزب اسلامي رسنيو ته په لېږلې اعلاميه کې دغه پېښه غندلې او له حکومته يې غوښتي، ترڅو عاملين يې د قانون منګولو ته وسپاري او نيول شوي کسان چې خپله اصف مومند هم پکې دی له بنده خلاص کړي.
حزب اسلامي وايي، حکومت دې د داسې پېښو د بيا تکرار مخه ونيسي او زياتوي چې دغه ډول کړنې (نه موږ او نه هيڅ افغان ته د منلو دي او نه ئې په وړاندي بې تفاوته پاته كېدى شو چې د حكومت تر سلطې لاندي سيمې او هغه هم د هوايي ډګر دننه څو بدمست او مغرور وسله وال د سيمي يو مخور او د ولس دروند استازى ونيسي).
د دوی په وينا، يواځې دا نه چې د اولس استازی نيول شوی، بلکې په ساتونکو يې وسله وال بريد شوی او د دوی استقبال ته په راغليو کسانو هم ډزې شوي دي، چې په پايله کې يې لس تنو ته مرګ ژوبله اوښتې ده.
په اعلاميه کې راغلي، که حکومت په دغه پېښه کې عاجل اقدامات ونه کړي نو د مومند کورنۍ او پلويان به يې د غچ اخيستلو لار ونيسي چې پايلې به يې ښې نه وي.
سرچينې زياته کړې، چې دا د بلخ د والي عطامحمد نور د هغو ګواښونو بېلګه ده، چې اوونۍ وړاندې يې ويلي و که غوښتنې يې ونه منل شي نو هوايي ډګرونه او دولتي تاسيسات به په زور ونيسي.
د دوی په وينا، که د يادې پېښې په اړه جدي اقدام ونه شي، خلک به د خپل سر او عزب ساتلو لپاره په نورو لارو چارو غور وکړي.
اصف مومند يوه اونۍ وړاندې ادعا وکړه چې لویې څارنوالۍ ته د بلخ د والي عطا محمد نور د فساد، غصب او دولتي عايداتو د لوټ کولو د یو لړ اسنادو او شواهدو د سپارلو لپاره کابل ته تللی دی.
نوموړي له تېرو دوه کلونو راهيسې په ځلونو د بلخ له والي شکايتونه کړي او هغه يې د دولتي عايداتو په لوټ کولو او فساد تورن کړی و، مومند له نيولو څو ورځې مخکې ادعا کړې وه، چې وېږېږي د بلخ د والي کسان ورته زیان ونه رسوي.
اصف مومند د بلخ هوايي ډګر ته په رسېدو د عطا محمد نور د وسله والو له لوري ونيول شو او د دغه ولايت والي وويل: چې مومند د لویې څارنوالۍ د رسمي مکتوب پر بنسټ د بلخ امنیتي ځواکونو نیولی دی.
خو د افغانستان لويې څارنوالۍ وويل، چې د دوی له لوري د نوموړي وکيل د نيولو ادعا بې بنسټه ده او داسې هيڅ امر د دوی له لوري نه دی ورکول شوی.
