(کابل ټکی کام ۱۳۹۶وږی ۱): د سوريې رسنيو ويلي، چې د دغه هېواد په رقه ښار کې د امريکايي اېتلاف په بمباريو کې د ښځو او ماشومانو په ګډون لسګونه تنه ولسي وګړي وژل شوي دي.
ځايي سرچينې وايي، چې د اېتلاف الوتکو د دغه ښار په حارة البدو او حارة السخاني سيمو کې سختې بمبارۍ کړي، چې په ترڅ کې يې له پنځوسو زيات ولسي وګړي وژل شوي او لسګونه تنه نور ټپيان دي.
سرچينې زياتوي، په دغو بمباريو کې ۱۹ ماشومان، ۱۲ ميرمنې او نور ټول ولسي وګړي وژل شوي چې ښايي شميره يې له دې هم لوړه شي.
د ورکړل شويو راپورو پر اساس، د بمباريو له امله ډيری ودانۍ زيانمني شوي او لسګونه کسان لا هم د خاور او کنډوالو لاندې بند پاتې دي.
په دغه ښار کې کردي مليشو او سوري ځواکونو د امريکا د هوايي او ځمکني ملاتړ په مرسته د داعش ډلې پر خلاف عمليات پيل کړي، چې تر ډيره پکې ولسي وګړو ته هم مرګ ژوبله رسېدلې ده.
