(کابل ټکی کام ۱۳۹۶وږی ۱): د امريکا متحده ايالاتو ولسمشر ډونالډ ټرمپ تېره ورځ د افغانستان او سيمې په اړه د نوې ستراتيژۍ د اعلان پر مهال په پاکستان سختې نيوکې وکړې او دغه هېواد يې د وسله والو سره په ملاتړ تورن کړ.
ډونالډ ټرمپ وويل، چې پاکستان ته يې د ترورستانو د ځپلو په موخه په ميلياردونه ډالر ورکړي، خو لا هم دغه هېواد ترهګرو ته پناه ورکړې او په وينا يې (هغه ترهګر ساتي چې مونږ ورسره په جګړه کې يو، نور دغه پټنځايونه مونږ ته د زغملو نه دي).
وروسته له هغه چې ولسمشر ټرمپ پر پاکستان نيوکې وکړې، چېن د دغه هېواد ملاتړ وکړ او ويې ويل چې پاکستان د ترهګرۍ پرضد تر ټولو ډېره مبارزه کړې او له نړيوالې ټولنې يې غوښتي چې بايد د هغوی د قربانيو درناوی وشي.
د چين د بهرنيو چارو وزارت وياند هاوچوننګ ويلي، چې (پاکستان د ترهګرۍ ضدجګړه کې تر ټولو زياتې قربانۍ ورکړي او نړيواله ټولنه بايد د دغه هېواد د هڅو درناوی وکړي).
په عين حال کې د ټرمپ له څرګندونو وروسته د پاکستان صدراعظم شاهد خان قان عباسي د خپلې کابينې غونډه رابللې او د سويلي اسيا په اړه د امريکا د نوې ستراتيژۍ په اړه يې خبرې اترې کړي.
له دغه غونډې وروسته د پاکستان د بهرنيو چارو وزارت رسنيو ته په لېږلې خبرپاڼه کې پر دغه هېواد پر لګېدلو تورونو اندېښنه څرګنده کړې او ويلي يې دي، چې پاکستان به خپله خاوره د هيڅ کوم هېواد پرضد کارېدو ته نه پرېږدي او له امريکا يې غوښتنه کړې چې (پاکستان کې ترهګرو ته د پناه ځايونو ورکولو) غلطو دعوو پر ځای دې له دغه هېواد سره د ترهګرۍ د ختمولو لپاره ګډ کار وکړي.
پاکستان وايي، په افغانستان کې د سولې او امن راتلو يواځينۍ لار د افغانانو په مشرۍ مذاکرات دي او زياتوي چې افغانستان کې د تيرو اوولس کلونو د جګړو په ترڅ سوله رانغله او ښايي راتلونکې کې هم له دې لارې سوله رانشي.
له بله پلوه په اسلام اباد کې د پاکستان د بهرنيو چارو وزير خواجه اصف د امريکا له سفير ډيويډ هيل سره ليدلي او د امريکا د ولسمشر ډونالډ ټرمپ د نوې تګلارې په اړه يې ورسره خبرې کړي دي.
د بهرنيو چارو وزير خواجه اصف ويلي، چې پاکستان په افغانستان کې د سولې او ثبات لپاره تر خپلې وسې هڅې کړي او د ترهګرۍ له منځه وړلو لپاره يې تل قربانۍ ورکړي او زياته کړې يې ده، چې پاکستان د ترهګرۍ د ځپلو او په سيمه کې د ثبات لپاره له نړيوالې ټولنې سره ګډ کار کولو ته ژمن دی.
