طالبانو د زنخان ولسوالۍ مرکز او څلور پوستې نيولي
(کابل ټکی کام ۱۳۹۶وږی ۲): وسله والو طالبانو د غزني ولايت د زنخان ولسوالۍ مرکز او شاوخوا امنيتي پوستې نيولي، چې په ترڅ کې يې لسګونه پوليسو ته مرګ ژوبله اوښتې ده.
د طالبانو له لوري کابل ټکی کام ته په رالېږلې خبرپاڼه کې راغلي، چې د دوی وسله والو تېره شپه د غزني په مرکز کې د زنخان ولسوالۍ مرکز او څلور امنیتي پوستې نيولي دي.
د يادې ولسوالۍ مرکز او ورسره اړونده پوستې د چارواکو له لوري د غزني مرکز روضې سيمې ته انتقال شوی و.
طالبان وايي، په دغه بريدونو کې ګڼ پوليس، اربکيان او عسکر وژل شوي او يو شمير نور ټپيان دي، خو د کره شميرو په اړه يې څه نه دي ويلي.
دغه راز طالبانو ويلي، چې د ولسوالۍ د نيولو په پايله کې د دوی وسله والو ته درې ټانګونه، يو رينجر موټر او په زياته اندازه وسلې او نور پوځي توکي هم لاسته ورغلي دي.
ځايي اوسېدونکي وايي، چې د سختې جګړې وروسته د ولسوالۍ مرکز او شاوخوا امنيتي پوستې د وسله والو طالبانو لاس ته ولوېدې.
يوې سيمه ييزې سرچينې کابل ټکی کام ته د ولسوالۍ سقوط تائيد کړ او زياته يې کړه، چې په نښتو کې ګڼو پوليسو ته مرګ ژوبله اوښتې چې ځينې د جګړې په سيمه کې پاتې شوي هم دي.
تر اوسه د دولت کومې رسمي سرچينې په دې اړه رسنيو ته څه نه دي ويلي.
