سرلیکنه
لوی اختر را ورسېد. د نړۍ مسلمانان له عرفې وروسته د قربانۍ آمادګي نیسي؛ خو د امریکا لخوا افغانستان او جنوبي اسیا لپاره په نوې ستراتیژي کې افغانان له عرفې او د لوی اختر له لمانځه دمخه قربانی شول. هغه څوک چې د اسلام په مقدس دین مشرف شوي وي، ټولې ورځې یې د خوشحالۍ وي، خو مسلمانانو ته د کمکي او لوی اختر ورځې تر نورو ورځو زیاتې د خوشحالۍ ورځې دي.
د لوی یا د قربانۍ د اختر ورځ رانږدی شوه. په دواړو اخترونو کې د خپل یووالي لپاره مسلمانان په خوښیو سره راټولېږي. د اختر د قربانۍ لپاره چې د چا توان وي څآروي اخلي او ابراهیمي سنت تازه کوي، د خپلو شتو په لګښتونو قرباني کوي.
په افغانستان کې چې دمخه بشپړامن و، په هرکور او کلي کې بشپړې خوشحالۍ وي. اوس په هر کور کې غم دی، له هره کوره جنازې پورته شوې دي، د اختر د خوشحالیو پر ځای افغانان د غم پر ټغرناست دي. دا دی د جګړې درېم پړاو یانې د امریکا د یرغل را وروسته د نړۍ مسلمانان د څارويو په رانیولواختر کوي، خو د افغانو هر لوی اختر د سرونو د قربانۍ اختر وي.
په روان کال کې امریکایي هوایی ځواکونو پر افغان ولس تر ۱۷۰۰ زیات بریدونه کړي دي. افغان ځواکونو هم د افغان ولس په کورونو اوبانډو په یوه او بله پلمه عملیات ترسره کړي دي. بې ګناه ماشومان، عمر خوړلي سپین ږیري او ښځې یې شهیدانې کړې دي. هغه څوک چې ځان ته مسلمان وايي، هغه هیڅ وخت بې ګناه انسانان او خپل بې دفاع ولسي وګړي نه وژني.
د نړۍ مسلمانان د عرفې په ورځ د نبوي احادیثو او الهي لارښوونو له مخې د الله بندګانو ته د الهي رحمتونو د پرېمانیو د زیاتوالي او هوسا ژوند غوښته کوي. د تېرو کلونو په څېر د عرفې او قربانۍ د اختر د ورځې په مناسبت مسلمانان د عالمیانو د پروردګار څخه د خپلو ګناهونو بخښنه غواړی. په عرفه او لوی اختر کې مسلمانان له الهي مهربانۍ څخه په ګټه پورته کولو، په خپلو کې د یووالي غوښتنه کوي. خپل پروردګار ته سرونه پرسجده ږدي. د اسلام د مبین دین چې تر ټولو ادیانو غوره دین دی، د دواړو اخترونو په لمانځنو یو له بل سره خوشحالۍ کوي، یو بل ته د لوی (قربانۍ د اختر) مبارکۍ ورکوي؛ خو هغه افغانان چې د امریکا په نوې ستراتیژۍ سره په لومړي ځل په هرات کې قرباني (شهیدان) شول، د هغوی کورنۍ د خپلو قربانیانو په غم د ویر او ماتم په ټغر ناست دي. د لوی اختر له قربانۍ په هرات کې د نوې ستراتیژۍ قرباني ړومبۍ شوه.
د لوګرولایت د دښت باري سیمې د یوې کورنۍ ۲۸غړي هم د امریکا د نوې ستراتیژي قرباني شول. زیات شمېر ښځې او ماشومان د لوی اختر له څارویو دمخه د نوې ستراتیژۍ قرباني شول. افسوس د افغان ولس په بې وسۍ او افسوس د موجوده حکومت په بې کفایتۍ.
د امریکا نوې ستراتیژۍ ته خو حکومتي بې ضمیره چارواکي ونڅېدل. د نوې ستراتیژۍ پیل خو له هرات او ورپسې له لوګره وشو. حکومتي چارواکو ته هم د نوې ستراتیژۍ پیل څرګند شو. د امریکا نوې ستراتیژي د مسمانانو او په ځانګړې توګه د افغانانو وژل ثابت شول. حال دا چې د افغانانو د مبارک دین فلسفه په خپلو کې یو بل سره مینه او محبت، په ورورۍ سره بلنه، یو بل سره په مینه او اخلاص مرسته ده؛ نه د هرات او لوګر د بې دفاع مسلمانانو وژل. د اسلام په مقدس دين کې د يوه مومن وژل د ځمکې پر مخ د ټول انسانیت وژل دي.
د لوی اختر قربانیو ته چې د هرات ولایت د زېرکوه ولسوالۍ او لوګر بې ګناه ولسي وګړي خوشحالېدل، هغه له عرفې دمخه د نوې ستراتیژۍ قربانيان شول. دا په هرات او لوګر کې د نوې ستراتیژۍ لومړي هوايي بریدونه دی. دا چې تر دې وروسته د امریکا په نوې ستراتیژۍ کې د څومره شمېر افغانانو شهادت په نظر کې نیول شوی دی، دا به د ټرمپ هغه یارانو اومشاورینو ته څرګنده وي چې په کمپ ډیويډ کې یې د افغانستان او جنوبي اسیا لپاره نوې ستراتیژي جوړه کړه.
د نړۍ مسلمانان له عرفې وروسته د لوی اختر د قربانیو تیاری نیسي او ابراهیمې سنت ژوندي کوي. د دې سنتو د ژوندي کولو ثوابونه د الله په بې پایانه دربار کې بې پایانه دي، خو د هرات او لوګر ولایاتو د نوې ستراتیژۍ قربانیانو – چې د امریکا دهوايي پوځ لخوا شهیدان شول- مقام تر هر چا لوړ شو؛ خو د قربانیانو د کورنیو تر څنګ ټول افغان ولس په لوی اختر کې د غم په ټغرکښېناسته.
