نړۍ کې داسې ډېر کم ولسمشران پیدا کېږي، چې هغه دې ټولې ژمنې سرته رسولې وي؛ خو که ټولې نه وي؛ نو نیمايي یې هم حتماً پوره کوي. د ټولټاکنو، نوماندۍ، مبارزې او واک ته د رسېدو وختونه جلا دي. دلته زیات نوماندان نه پوهېږي/ نه پوهېدل، چې دوی به ولسي جرگه کې څه کوي؟ ولایتي شورا کارونه څه دي او حتا ولسمشرۍ ته که بریالی شي؛ نو کارونه او واکونه یې تر کوم حده دي؟خو د ټولټاکنو او د ټاکنیز کمپاین په وخت به یې داسې شعارونه ورکول، چې هېڅ د ده له واک او صلاحیت سره یې تړاو نه درلود.
د ۱۳۹۳ل کال د ټولټاکنو په ټولو نوماندانو کې د اوسني گډ حکومت د مشر اشرف غني کمپاین د اجراییه رییس عبدالله عبدالله سیال بلل کېده. غني داسې شعارونه ورکړل او ځینې یې خلک یې وغولول، چې ټولو فکر کاوه، که دی واک ته ورسېږي؛ نو سل ورځې وروسته به مو دسترخوان کې حتماً بدلون راځي.
د بدلون او دوام تر سرلیک لاندې غني ډېرې ژمنې ورکړې؛ خو د درې کلونو په تېریدو یې تراوسه هېڅ ژمنه سرته نه ده رسولې؛ بلکې واک او صلاحیتونه یې ورځ تر بلې محدودېږي او خپلې ټولې ژمنې یې بادونو یوړې.
پژواک خبري اژانس په روانه اوونۍ کې د تدارکاتو او تړونونو په اړه څېړنیز او مستند راپور خپور کړ، چې په راپور کې د غني او مېرمنې یې رولا غني د هغو خیانتونو څخه پرده پورته شوې، چې غني زیات تړونونه د خپلې مېرمنې په امر له یوه لبناني شرکت سره کړي او میلیونونه ډالر یې حیف او میل کړي دي.
«پژواک ته بېلابېلو سرچینو ویلي، چې دغه تړونونه د ارگ په حکم خطيب و العالمي” شرکت چې د افغانستان په دولتي ادارو کې په بېلابېلو نومونو معرفي شوى، په ١٣٣٨ لمريز کال (١٩٥٩زېږديز) کې د لبنان په بيروت ښار کې د “منير الخطيب” له لوري رامنځته شو چې په ١٣٤٣ لمريز کال (١٩٦٤زېږديز) کې له هغه وروسته چې “زهير العالمي” له دغه شرکت سره شريک شو د “خطيب و العالمي” په نوم ونومول شو. په افغانستان کې د ياد شرکت د فعالیت په اړه کره معلومات نشته، خو د پژواک له لوري یو ترلاسه شوی سند ښيي چې خطيب و العالمي تېر کال د اردن په پلازمېنه عمان کې افغان سفارت ته په افغانستان کې د کار کولو لپاره وړاندیز کړی دی.»
د ١٣٩٥ لمريز کال د کب په لسمه دغه شرکت د هېواد له سوداگرۍ او صنايعو وزارت څخه د “خطيب و علمي انجنيري مشورتي شرکت” د نوم په تفاوت سره د افغانستان له پانگونې د ملاتړ ادارې (ايسا) له لوري کاري جواز ترلاسه کړى دى.د هېواد د بهرنيو چارو وزارت په رسمي ليک کې هم ياد شرکت يو اردنی شرکت ياد شوى چې ان تر دې چې دغه تفاوت په نورو څو دولتي سندونو کې هم تر سترگو کېږي.
د ټولگټو چارو وزارت تخنيکي معين احمدولي شېرزي ویلي، چې له دغه شرکت سره ټول تړونونه د غني او مېرمن یې رولا غني په حکم شوي او دوی هم د ارگ حکم پرځای کړی دی.
تراوسه دغه لبناني شرکت سره څلور تړونونه شوي، چې تراوسه یې یو کار هم گټې اخیستنې ته نه دی سپارل شوی. په دغو پروژو کې د ٢٨ميليونه او ٦٠٠زره افغانيو په لگښت د ښاري بسونو (مترو گاډي) د ١١١کيلومتره جوړېدو سيستم د طراحۍ پروژه، د ٢٦ ميليونه او ١٦٠زره افغانيو په لگښت د سراى شمالي سړک په گډون د کابل په ښار کې له ٢٠ کيلومتره ډېر سړک د ډيزاين پروژې تړون، د ١٥ميليون افغانيو په لگښت د پاچا او شينه پله ډيزاين او سروې د چارو پروژې تړون، د ١١ ميليونه افغانيو په لگښت، کابل د تقاطع سړکونو ډيزاين چې د گڼې گوڼې لامل شوي، شامل دي.
په روان کال کې له دغه لبناني شرکت سره د کابل اداري مجتمع د ډيزاين او طرحې پروژه چې د دولتي اورگانونو د اداري مجتمع د ماسټر پلان تر ټولو ستر تړون دى، د ١٣٩٦ لمريز کال د غبرگولي په ٢٧مه د کابل په دارالاامان سيمه کې د څا باندې ١٥ميليونه ډالرو په ارزښت له دغه لبناني شرکت سره لاسليک شو.
دا د غني د درغلۍ یوازې یوه نمونه ده، چې پژواک ترې پرده پورته کړه. خدای خبر به غني به له دې وړاندې څومره ملي پروژې د امریکايي او لبناني شرکتونو سره له قربان کړي وي.
