ډاکټر محبوب سالم
سره له دې چې د امریکا د ولسمشر ټرمپ نوې ستراتیژي د امریکا د تېرو ولسمشرانو د ستراتیژیو د نظامي اړخ یو تکرار دی او د ځینو پټو دیپلوماسیو د لوڅېدا او د سیمې په کچه د مسایلو په اړه په لوړه کچه د مطرح کېدا پرته بله داسې کومه نوې خبره پکې نشته چې په افغانستان کې د سولې او ثبات د راتلو او د جګړې د ختمېدو سبب وګرځي، خو بیا هم په کابل کې د واکمن نظام پلویان او په ټوله کې د طالبانو ټول مخالفین زیات ورته خوشاله دي او په دې اند دي چې امریکا د پخوا په پرتله د دوی غږ اورېدلی او کېدای شي په نهایت کې دغه ستراتیژي د طالبانو د کمزوري کېدو سبب وګرځي.
خو د چارو کارپوهان بیا په دې نظر دي چې د ټرمپ دغه ستراتیژي به د جګړې موازنه بدله نه کړي او نه به د طالبانو د زیاتېدونکي قوت د مخنيوي سبب شي؛ ځکه کله چې طالبان د خپل حکومت له ړنګېدو وروسته ډېر د کمزورۍ په حالت کې ؤ او امریکا له خپلو متحدینو سره یو ځای په افغانستان کې لکونه پوځیان لرل د طالبانو د بیا منظم کېدو او قوت د کمزوري سبب نه شول؛ نو نن به څنګه د پخوانیو ستراتیژیو په تکرار د طالبانو د کمزورۍ باعث شي؟
د امریکا سفارت ته نږدې نوي کابل بانک په څانګه په برید سره طالبان غواړي دا پیغام ورکړي چې د دوی په جګړه ییز مورال د ټرمپ نوې ستراتیژۍ کوم منفي اغیز نه دی پرې باسلی، عملیات او بریدونه يې د پخوا په نسبت ګړندي شوي او د امریکا د هیڅ تهدید پروا نه لري او کولای شي هر ځای چې وغواړي برید ترسره کړي. همدغه راز د دې برید لپاره د کابل د تر ټولو خوندي او سختې ساتل کېدونکې سیمې په غوره والي طالبان غواړي دا پیغام ورکړي چې د دوی د بریدونو مخه نه تهدیدونه او فشارونه نیولای شي، نه تبلیغات او نه د ګډ حکومت د چارواکو نوي امنیتي تدابیر او موانع.
له بلې خوا د هیواد په بېلابېلو ولایتونو کې په پرلپسې ډول د نوي کابل بانک د څانګو په نښه کېدل او په دغو څانګو چې د امنیتي ځواکونو او نورو دولتي مامورینو د معاشاتو تأدیه کولو ته ځانګړې شوې دي، په پرلپسې بریدونو کې د ګډ حکومت د امنیتي ارګانونو پاتې راتلل په حقیقت کې هغه څه ؤ چې طالبانو غوښتل د دغو بریدونو له لارې د حکومت امنیتي حیثیت ته لا زیاته ضربه ورکړي او د دوی د بریدونو په مخنيوي کې يې وړتیا وننګوي.
د شنونکو له انده په یو ډول اهدافو پرلپسې بریدونه د بریدونو لپاره سیاسي جریاناتو ته په کتو د مناسب وخت او موقعيتونو انتخاب د طالبانو د خاصو عملیاتو د تکتیک یوه برخه ده او هدف يې ترې د ګډ حکومت د امنیتي ځواکونو امنيتي حیثیت ته ضربه ورکول، د ګډ حکومت د امنیتي ځواکونو د مورال کمزوري کول او د ګډ حکومت د کومې لاس ته راوړنې پر مهال له رواني او تبلیغاتي منفي اغېزو څخه د خپلو افرادو ساتل او په دقیقو حیرانوونکو ګذارونو خپلو لیکو ته د نویو افرادو جلب و جذب دی چې تر ډېره بریده يې دغه تکتیک بریالی دی.
