د هند حکومت حکمتیار ته د ځینو همکاریو په بدل کې د سیاسي او اقتصادي امتیازاتو وعده ورکړې
نعیم نظامي
په پلازمېنه کابل کې د حزب د یوې باوري سرچینې د معلوماتو له مخې، په کابل کې د هند د سفارت یوه لوړ رتبه دیپلومات – چې په حقیقت کې د پولې دواړو غاړو ته استخباراتي چارې پر مخ وړي او د هندوستان د استخباراتي سازمان (را) له لوري د سیمې لپاره نماینده دی- له حکمتیار سره د منځګړو په توسط د یوې پټې استخباراتي معاملې په سر په خبرو بوخت دی.
سرچینه زیاتوي، منځګړي د ګډ حکومت د ملي امنیت مشاور (حنیف اتمر) او د ملي امنیت لوی رئيس (معصوم ستانکزی) دي او نږدې دوه اونۍ د مخه يي د دارالامان په سیمه کې د حکمتیار په هستوګنځي کې په دې اړه له حکمتیار سره تنها په تنها وروستی ملاقات کړی او خبرې یې ترسره کړي.
سرچینه زیاتوي، د هند استخباراتي سازمان غواړي د حکمتیار له هغو امکاناتو څخه چې د پولې په بله غاړه کې یې لري، خپلو استخباراتي موخو ته د رسېدو لپاره ګټه واخلي او په بدل کې يې حکمتیار ته په ګډ حکومت کې د سیاسي امتیازاتو او اقتصادي امکاناتو وعده ورکړې ده.
همدغه راز د هندوستان استخباراتي سازمان له حکمتیار سره د طالبانو د هغو چارواکو د ترور په اړه هم په غیر مستقیه توګه خبرې کړي، کوم چې د هندوستان حکومت په افغانستان کې خپلو ګټو ته تر ټولو زیات تهدید ګڼي او ګډ حکومت هم ترې زیاته وېره لري. د سرچینې له قوله د طالبانو دغه چارواکي زیاتره هغه کسان دي کوم چې د طالبانو سرتېري بریدونه تنظیموي او هم هغه شخصیتونه دي کوم چې د سیمې او نړۍ د بېلا بېلو هېوادونو سره د طالبانو د سیاسي اړیکو په برخه کې کار کوي.
د شنونکو له انده، بهرنۍ او کورنۍ استخباراتي ادارې په دې لټه کې دي چې د پولې دواړو غاړو ته د حکمتیار له امکاناتو څخه د خپلو استخباراتي اهدافو د تحقق په برخه کې عظمي استفاده وکړي؛ خو که حکمتیار له احتیاط څخه کار وانخلي کېدای شي خپل ټول تنظیم د یوې بلې پټې استخباراتي جګړې لور ته ور ټېل وهي، چې تر ټولو زیات زیان به يې نوموړي او د نوموړي تنظیم ته رسیږي.
