ابو یاسر افغان
هره ورځ وژل کېږو، خپلواکي نه لرو، سر او مال مو محفوظ نه دی، د نړۍ ټول کفار را یوځای شوي او زموږ وژلو ته یې را دانګلي دي، موږ وینو چې آن امریکایي جینکۍ هم د امریکا نه دلته زموږ د وژلو او د اسلام د ختمولو لپاره راغلي دي، زموږ د وینو سیلابونه بهیږي خو د دې ټولو وحشتونو په مقابل کې زموږ معمولي عکس العمل ته تروریزم ویل کېږي!!
هوکې!
دا دی اختر راغی خو زموږ اختر نه دی. بمباریاني، چاپی او جګړې دي، زرګونه پلرونه د کفارو او منافقینو په زندانونو کې بندیان دي او بچیان یې د راتلو لارې څاري، زرګونه نور د دین او وطن د دفاع په ګناه له خپلو کورونو لرې په تورو غرونو کې شپې سبا کوي، لسګونه زره وګړي مو شهیدان شول، یتیمان یې در په در خیراتونه غواړي، هدیرو کې نورو د قبرونو ځای نشته، هره ورځ ویرونه او مرګونه دي، د هر با احساسه مسلمان شونډو وچ پتري نیولي او د خپل حق نه محروم کړل شوي دي، غلۀ او خاینان د واک پر ګدۍ ناست او د کفارو په خدمت لګیا دي، هیڅوک د دې بیچاره ولس په درد دردمن نه شو، که یو څوک د خپل دین، عزت، مال، خپلواکۍ او ګران هېواد څخه د دفاع لپاره میدان ته راؤځي هغه ته تروریست، باغي، د سولی او پرمختګ دښمن ویل کېږي، خو که یو له لرې وطن نه راغلی د یهودیانو جنرال زموږ خلک وژني، پر کلیو او کورونو بمباري کوي، شخصي زندانونه لري، زموږ د دین او ولس سره اشده دښمني لري، هغه ته پر سینه د اتلانو مډالونه ټومبل کېږي. ګډوډي ده، ظلمونه وحشتونه او انارشي ده، د ملت قاتلان پر ملت حاکمان دي، د چارواکو کورنۍ په خارجي هېوادونو کې د عیش او عشرت زنده ګي کوي او چارواکي دلته د بې ګناه مسلمانانو د غریبۍ جونګړې او خټین کورونه هم نه پریږدي او پۀ درنو وسلو یې ویجاړوي، ولسي وګړي وژني، پر ودونو او جنازو د بریدونو طراحان همدوی دي، د کفارو لپاره کوردینات دوی ورکوي او دغه ټولو وحشتونو ته د وطن دوستۍ په نوم ورکولو سره ولس ته په سترګو کې خاورې اچوي…
دا اختر دی، یتیمان د خپلو پلرونو، بې ورونو خویندې د خپلو شهیدانو ورونو او معصومي ناوکۍ د خپلو خوږو خاوندانو پر شهادت ویر کوي، اختر له کومه شي، خلک د ماښام او سهار یو کپ مړۍ ته حیران دي، د هیچا سر او مال محفوظ نه دی، هره شېبه د هېواد په یوه برخه کې د بمبار او چاپې په ترڅ کې د مظلومو مسلمانانو د شهادت خبرونه نشریږي، دا دی یواځې په همدې یوه اونۍ کې په کندوز، هرات او لوګر کې نږدې ۷۰ تنه ملکي وګړي شهیدان او لسګونه نور ټپیان شول… زموږ له ملت نه خپلواکي اخیستل شوی، ځمکه او فضا مو د دین او ولس د قاتلانو په لاسونو کې ده، مدرسې او مسجدونه مو شاړ دي، عالمان او حافظان مو د تورو تمبو شاته پراته دي، عیاش، فحاش، بې دینه، ایمان پلورونکي او وطن پلورونکي مو پر ملت مسلط دي، اوس نو تاسو قضاوت وکړئ چې دا هم اختر دی، آیا اوس به هم موږ خوشحالي ولمانځلی شو؟؟
