د کډوالو نړیواله اداره وايي، د برما په رخاین ریاست کې له وسله والو شخړو وروسته په پنځو ورځو کې د روهینګیا ۲۰ زره مسلمانان له خپلو کورونو وتلي او بنګله دېش ته تللي دي.
د روهینګیا پر مسلمانانو وروسته له هغه د بودایانو وحشت پیل شو کله چې د روهینګیايي مسلمانانو یوې وسله والې ډلې د پوځ پر مرکزونو بریدونه وکړل. له تیرې جمعې راهیسې د برما پوځ د مسلمانانو پر شاوخوا ۳۰۰ کلیو بریدونه کړي دي او لسګونه مسلمانان یې وژلي دي.
د برما یو اوسېدونکی محمد فیصل اراکاني وايي: له ۲۵ اګست راهیسې تر دېرشو زیاتو کلیو باندې بریدونه شوي دي، یو شمېر کلي سوځول شوي، پر مېرمنو تېری شوی او ماشومان ژوندي سوځول شوي دي. د نوموړي په خبره په بریدونو کې بې شمېره مسلمانان وژل شوي او ټپیان شوي دي.
په بنګله دېش کې د کډوالو کېمپ کارکوونکي وايي چې ځینې مسلمانان په زخمي حالت کې بنګله دېش ته وراوښتي دي. ځایي خلکو رسنیو ته ویلي دي چې زرګونه نور کسان لا هم هڅه کوي چې بنګله دېش ته واوړي.
د یادونې وړ ده، په رخاین ریاست کې تر ۱۰ لکه زیات مسلمانان اوسي او شاوخوا څلور لکه مسلمانان یې بنګله دېش ته کډوال شوي دي.
