(کابل ټکی کام ۱۳۹۶وږی ۹ فرید افغان)
لویدیځو رسنیو د امریکایي چارواکو له قوله خبر ورکړی چې دغه هیواد ښایي په راتلونکو څو میاشتو افغانستان ته ۳ زره او ۹ سوه اضافي عسکر لیږي.
پنټاګون ویلي چې امریکایي چارواکو لا د عسکرو لیږلو پریکړه نده کړې خو وایي چې ډیر ژر به دا کار وشي.
د یادو امربکایي عسکرو رالیږل د ټرمپ د پالیسۍ د اعلان څخه تر مخه ترتیب شوي و، چې مخکې ترمخکې ورته په دریو بیړیو کې د ۶۰۰ ټانګونو په ګډون زرګونه وسایل او نظامي توکي د کراچۍ په بندر را انتقال شوي و.
د ټرمپ په نوې ستراتیژۍ کې د جګړې په دوام ټینګار شوی، او د اضافي ځواکونو زیاتول د ضرورت پر بنا ښوودل شوي.
د طالبانو مشر په اختریز پیغام کې ویلي چې په افغانستان کې د سولې د راتګ لپاره “عمده خنډ” د نړیوالو ځواکونو شتون دی.
د دفاع وزارت جګپوړو چارواکو ویلي دي چې دا مهال په افغانستان کې تقریباً ۱۱ زره امریکایي عسکر دیره دي. پخوا دغه شمیر اته زره او څلور سوه یاد شوی و.
ځینې څیړنیزې ادارې بیا د امریکایي ځواکونو اوسنی شمیر د ۲۵ تر ۳۰ زرو ښیي چې په وینا یې اکثریت یې لاهم د افغان ځواکونو ترڅنګ د وسلوالو مخالفینو پرضد د جګړو په لمړۍ کرښه کې دي.
د امریکایي ځواکونو ډیریدل داسې مهال کیږي چې په افغانستان کې د امریکایي ځواکونو لخوا هوایي بمبارۍ بې کچې زیاتې شوې او په تیرو دو ورځو کې د کندوز، هرات او لوګر په ولایاتو کې تر سلو ډیر ملکي وګړي، ښځې ماشومان وژل شوي او همدومره نور ټپیان دي، چې تر اوسه یې په هکله نه امریکایي چارواکو، نه هم بشري سازمانونو، او نه د افغانستان ګډحکومت کوم غبرګون ښوودلی دی.
د تازه عسکرو په لیږلو سره به په افغانستان کې د ټولو امریکایي عسکرو شمیر پنځلسو زرو ته ورسیږي.
باید وویل شي چې څو ورځې وړاندې هم کابل ته ۱۹۰ امریکایي عسکرو د رسیدلو راپور ورکړل شوی ؤ .
