لیک : همایون عیسی خېل
کله چې ابراهیم خلیل الله علیه السلام خپل ګران زوی اسماعیل علیه السلام د الله جل جلاله په حکم سره ذبح کوو، نو جبراییل علیه السلام د هغه په بدله کې فدیه راوړه ، له اسمانه د کوځېدو په وخت کې دا وېره ورته پیدا شوه چې زما تر رسیدو څخه یې مخکې حلال نه کړي ، له دې وجې یې دغه کلمات وویل : الله اکبر ، الله اکبر ، ابراهیم علیه السلام چې دی ولید نو دغه کلمات یې وویل : لااله الاالله والله اکبر ، کله چې اسماعیل علیه السلام له فدیې څخه خبر شو نو دغه کلمات یې وویل : الله اکبر ولله الحمد .
د تکبیرات تشریق په اړه ۱۰ ضروري مسائل وړاندې کول اړین بولم هغه :
۱= نهم ( ۹ ) د ذوالحجې د سهار لمانځه نه نېولې تر دیارلسم ( ۱۳ ) د ذوالحجې مازدیګر لمانځه پورې به الله اکبر، الله اکبر، لا اله الا الله والله اکبر، الله اکبر، ولله الحمد ویل په کار دي .
۲ = د فرض لمانځه څخه وروسته یو پېره لوستل واجب دي .
۳= سړي به یې په اوچت اواز سره او ښځې به یې په ټیټ اواز سره وایي .
۴= سلام ګرځولو پسې سمدستي یې ویل واجب دي ، تردې چې که د تکبیراتو ویلو نه مخکې یې خبرې وکړې او یا یې اودس مات شو تکبیرات تشریق ترې ساقطیږي .
۵ = که د تشریق په ورځو کې له چا څخه کوم لمونځ پاتې شي او د دغې کال د تشریق په ورځو کې یې راګرځوي نو د سلام ګرځولو نه وروسته د تکبیراتو ویل لازمي دي .
۶ = تکبیرات تشریق په مقیم باندې لازمي دي او په مسافر باندې هم د اقتدا له وجې لازمیږي .
۷ = په جمعې سره لمونځ کونکو او ځان ته لمونځ کونکو باندې او همداسې په سړي او ښځې دواړو باندې تکبیرات ویل واجب دي .
۸ = تکبیرات تشریق یو پېره په جهر سره ویل واجب دي ، دوه یا درې پېرې یې تکرارول په ټیټ غږ سره مستحب دي .
۹ = . تکبیرات په متوسط اوچت اواز سره ویل په کار دي ، ډېری خلک یې په ارام سره واي باید اصلاح یې وشي .
۱۰ = که د فرض لمانځه څخه وروسته تکبیرات له چا څخه هېر شي وروسته یې قضا نشته ، د الله جل جلاله څخه به بخښنه غواړي تر څو ورته مغفرت وشي . ( بدائع الصنائع ، ټوک : ۱ ، مخ : ۱۹۵ / الدرالمختار مع رد المختار ټوک : ۲ ، مخ : ۱۷۹ – ۱۸۰ / البحرالرایق ټوک : ۲ ، مخ : ۱۶۵ باب العیدین )
