(کابل ټکی کام ۱۳۹۶ وږی ۱۵ فرید افغان)
د Cpag یا د خوندیتوب او عدالت غوښتنې ادارې لخوا یو څیړنه خپره شوې جې څرګندوي په تیره یوه میاشت کې سلګونه افغان ملکي وګړي د خونړیو بریدونو او بمباریو ښکار شوي دي.
د ادارې لخوا په خپره شوې خبرپاڼه کې راغلي چې د هیواد په سرتاسر کې د دوی د څیړنو او معلوماتو پر بنسټ په یواځې د تېرې مياشتې په اوږدو کې ٢٥٤ ملکي وګړي وژل شوي او ٣٦٦ نور ټپيان شوي دي.
د Cpag ادارې په وینا دا مرګ ژوبله تر ډیره په هوایي بمباریو او د ګډو ځواکونو په شپینیو چاپو کې رامنځته شوې.
د ملکي وګړو د خونديتوب او عدالت غوښتنې ډلې د راپور له مخې، له يادې شمېرې څخه ٧١ کسانو ته په ننګرهار، هرات او لوګر ولايتونو کې د نړيوالو هوايي ځواکونو د بريدونو له امله مرګ ژوبله اوښتې دع
خبرپاڼه زیاتوي د اګست میاشت تر ټولو خونړۍ او مرګونې میاشت وه چې ډیر ملکي افغانان یې د ویر په ټغر کینول.
یادې ادارې له نړیوالو ځواکونو افغان عسکرو او وسلوالو طالبانو غوښتي چې د خپلو بریدونو په تر سره کولو کې دې د ملکي مرګ ژوبلې د مخنیوي لپاره جدي تدابیر ونیسي.
باید وویل شي چې په دې وروستیو کې د هیواد په مختلفو برخو کې هوایي بریدونه د تیر په پرتله بیساري ډیر شوي چې ډیری قربانیان یې هم ملکي وګړي دي.
