سرلیکنه
د امریکا دفاع وزارت ویلي چې افغان حکومت ته بي-۵۲ بم غورځوونکې الوتکې ورکوي. واشنګټن پوسټ لیکلي چې افغانستان ته به د هوايي بریدونو لپاره ایف-۱۶، اې-۱۰ او بي-۵۲ الوتکې واستول شي چې په افغانستان کې به د قاطع ماموریت په عملیاتو کې د افغان حکومت د مخالفینو په مقابل کې لاس ته راوړونې ولري. د امریکا دفاع وزارت دا هم څرګنده کړې ده چې د یادو الوتکو په عملیاتو سره به د طالب وسله والو هغه پټنځایونه هم له منځه وړل کېږي چې دوی په غرنیو سیمو کې جوړ کړي دي.
دې اعلان ته، چې امریکا افغان حکومت ته بېلابېلې جنګي او بم غورځوونکې الوتکې ورکوي، افغان د فاع وزارت ډېره خوښي ښوولې ده، ویلي یې دي چې د بي-۵۲ بم غورځوونکو او نورو الوتکو په وسیله به طالبان د خپلې ماتې له ویرې له جګړې لاس واخلي، یا به حکومت ته تسلیم شي او یا به د ځمکنیو عملیاتو پر مهال د هوايي بریدونو له لیارې له منځه یووړل شي.
افغان دفاع وزارت د امریکا لخوا په بي-۵۲ بم غورځوونکو الوتکو د خوښیو پر مهال دا هم ویلي دي چې د افغان ځواکونو د ځمکنیو عملیاتو پر مهال له بم غورځوونکو الوتکو څخه کار اخیستنه ډېره مهمه ده او له دې وروسته به د وسله والو طالبانو د ځپلو لپاره له هليکوپټرو هم ګټه واخیستل شي.
دفاع وزارت چې نوره یې د ځان په دفاع کې له ملي اردو، بهرنیو پوځونو، ځمکنیو عملیاتو او بمباریو تمه پای ته ورسېده، اوس د امریکا لخوا نورو جنګي الوتکو پورې خپله بقا تړي وايي: د امریکا لخوا بي-۵۲ بم غورځوونکې الوتکې د تروریستانو د مرکزونو د لهمنځه وړلو لپاره ډیرې مهمې او اغېزمنې دي. دفاع وزارت وايي، موږ هڅه کوو چې زموږ فعالیتونه پراخ او مخالفین (افغان طالبان) به وځپل شي.
دې بم غورځونوونکو الوتکو ته دفاع وزارت ځکه بې ډُوله ناڅي چې د افغانستان او جنوبي اسیا لپاره د امریکا په نوې ستراتیژۍ کې د سپینې ماڼۍ په وینا د ترهګرو د پټنځایونو په نښه کول او له منځه وړل هم په نظر کې نیول شوي دي.
په افغانستان کې د امریکایي بي-۵۲ او اپاچي هلیکوپتر الوتکو عملیات څه نوې خبره نه ده؛ له ۲۰۰۱ میلادی کال راپدېخوا امریکا په افغانستان کې د ډول ډول الوتکو په وسیله هوايي عملیات وکړل. بي-۵۲ په لومړي یرغل کې پر افغان ولس بمونه غورځولي او اوس هم هره اونۍ او هره میاشت د امریکا او افغان دفاع وزارتونه راپورونه ورکوي چې په سوونو اوزرګونو وسله وال طالبان یې له منځه وړي دي. په بمبارکې مرګ ژوبله او د ودانیو ویجاړي وي خو امریکا د طالبانو پر ځای تل ولسي وګړي بمبارکړي دي.
که د پنټاګان او ارګ اعلامیو ته وکتل شي، اوس به په افغانستان کې یو وسله وال طالب هم ژوندی نه وو پاتې. بي-۵۲ او نورو جنګي الوتکو خپلې بې رحمه بمبارۍ کړې دي، خو د وسله والو طالبانو په نامه یې بې وسلې ملکي ولسي وګړي شهیدان کړي دي.
که یو ځل بیا امریکایي بي-۵۲ په افغانستان کې د خپلې ناکامۍ د پټولو لپاره عملیات پیل کړي، د تېر په څېر به د طالبانو پر ځای د بمباریو مرګ ژوبله افغان ولسي وګړو ته اوړي، لکه څرنګه چې امریکایي الوتکو په کندز کې پر روغتون بمباري وکړه، په جنازو، ودونو، فاتحو کې یې ولسي وګړي شهیدان کړل، امریکا په ټول قوت سره په تېرو ۱۷ کلونو کې د افغان حکومت مخالف وسله والو طالبانو د له منځه وړلو توان پیدا نه کړ، بې ګناه ولسي وګړي یې په هره بمبارۍ کې شهیدان کړل؛ وروسته له دې به هم د بي-۵۲ لخوا د هرات او لوګر په څېر د کورونو د ویجاړېدو او مرګ ژوبلې تاوانونه افغان ولسي وګړي ګالي.
