انیسه غزنوی
دعیسوی دښمن لخوا حمله دومره ناڅاپه وه چې چاته د ځان ژغورلو وخت هم پیدا نه شو، د اسلام دښمنانو ټول ښار محاصره کړی ؤ دمسلمانانو ماشومان او لویان یې شهیدان کړل او دهغوی میرمنې یې په یو ځای کې سره قیدي کړې. په هیچا کې دمقابلې همت نه ؤ، دعیسوی دښمن له ویرې هیچا دخبرو جرأت هم نه شو کولا ی.
په دې نازک حالت کې یوازی یو کم عمره او تنکی هلک ؤ چې له همت څخه یې کار واخیست او خپل بوډا پلار ته یې وویل: باباجانه که ته له ماسره ځې نو مونږ دواړه به د موصل پاچا ته خپل فریاد ورسوو، چې زمونږ مؤمنې خویندي او میندي ددښمن له شره وژغوري.
بوډا پلار په جواب کې ورته وویل: زما بچیه زه به تاسره خامخا ځم.
تنکی مجاهد او بوډا پلار یو ځای دموصل ښار په لور روان شول دواړو شپه او ورځ سفر وکړ، لوږي او تندې ډیر وځورول مګر دمسلمانانو میرمنو فریاد او ژړا او دمظلومو شهیدانو غم دوې دمنزل په لور روان کړي ؤ.
پرله پسی مزل دوی ډیر ستړي او ستومانه کړل، یوه ورځ چې دخپل منزل په لور روان ؤ او د ستړیا نښی یې په مخ له ورایه ښکاریدې پر لاره یې يو سړی چې په آس سپور ؤ ولیدو، ددې په لیدلو دتنکي مجاهد له سترګو بې اختیاره رڼې اوښکي توی شوې په آس سپور سړي له تنکي مجاهد څخه د ژړا سبب وپښته تنکي مجاهد په ځواب کې ورته ټوله کیسه واوروله په آس سپور سړي په ډیر حیرت او غصې ترې وپوښتل: دومره لویه واقعه پیښه شوه او چا هیڅ هم ونه کړل؟
تنکي مجاهد وویل: له نورو څخه به څه ګیله کوو په داسې حال کې چې زمونږ پاچا خو ددې څخه خبر هم نه دی او مونږ خو اوس هغه ته خپل فریاد راوړئ.
ددې خبري په اوریدو سره سړی خپل آس څخه کوز شو دتنکي مجاهد په اوږه یې لاس کیښوده او په مینه یې ورته وویل: بچیه هغه بدبخت پاچا زه یم چې دومره خبر هم نه شوم چې زما په مسلمان ولس تیری شوی. دا پاچا نورالدین زنګي ؤ.
نورالدین زنګي تنکی مجاهد او بوډا دواړه له ځان سره موصل ښار ته ورسول او هلته یې خپل فوځ جمع کړ او داسې اعلان یې وکړ چې: سبا ته به د نورالدین توره په «رها» ښار کې ځلیږي……
په تاسو کې به څوک زما مرسته وکړي.
په ټول فوځ کې چوپتیا خپره شوه ځکه د «رها» او موصل ښارونو تر منځ ۹۰ میله فاصله وه.
یوازی یو غږ پورته شو چې داسې یې وویل: زه به انشاءالله سبا ته د سلطان سره یم.
ټولو د هغه غږ کونکې لور ته وکتل دا غږ د یو کم عمره هلک ؤ.
ددې کم عمره او تنکي مجاهد په لیدو ځینو افسرانو ورته وویل: بچیه! داجنګ دی څه د ماشومانو لوبه نه ده.
په دې وخت کې سلطان نورالدین په لوړ غږ وویل: داتنکی ځوان په خپلي وینا کې رښتونی او د قوي عزم خاوند دی فتحه او نصرت دهمداسی خلکو قدمونه ښکلوي مونږ به انشاءالله سبا ته «رها» ښار کې یو. دسلطان د وینا په اوریدلو ټول فوځ حملې ته تیار شول. بله ورځ داسلام لښکر «رها» ښار ته ورسیدو. دمسلمانانو او عیسویانو تر منځ سخت جنګ شروع ؤ اتفاقا د سلطان نورالدین زنګي مقابله دعیسوي سپه سالار سره وشوه، سلطان نورالدین زنګي په پوره قوت سره پر دښمن ګوزار وکړ مګر هغه بچ شو. کله چې سلطان نورالدین زنګي بل وار ته ځان تیاروه په دې وخت کې تنکي مجاهد په خپله توره د عیسوي سپه سالار غاړه ووهله او ددوزخ کندې ته یی ورسوو.
دعیسوي سپه سالار په مړینه ددښمن ټول فوځ په تيښته شو، ښار فتحه شو او مسلماني میرمنې دکفارو له شره خلاصې شوی.
ټولو ددې تنکي مجاهد همت او حوصله وستایله او د هغه څخه یې مننه وکړه.
دا تنکی مجاهد په کال ۱۱۳۸ع کې زیږدلی ؤ د ۳۰ کالو په عمر دمصر خلیفه شو او ۲۴ کاله یې پر مصر او شام خلافت وکړ ددې ۲۴ کالو په ترس کې یې ډیرو صلیبي جګړو کی اشتراک وکړ او بیت المقدس یې آزاد کړ دا عظیم خلیفه صلاح الدین ایوبی ؤ.
هغه چې یاد یې ټول مسلمه امت ته د غیرت او شجاعت درس ورکوي.
