بلخ: د عطانور د ملیشو لخوا د چمتال نیول شوې سیمې بیرته د طالبانو لاس ته لویدلې
(کابل ټکی کام ۱۳۹۶ وږی ۱۶ فریدافغان)
راپورونه وایي چې د بلخ ولایت د چمتال ولسوالۍ ډیری سیمې یوځل بیا د طالبانو لاسته لویدلې او هغوی پرې کامله واکمني لري.
د چمتال ولسوالۍ اوسېدونکي ادعا کوي چې د لوى اختر په ورځو کې ډېری هغو سيمو ته بېرته وسله وال طالبان ورغلي چې په شوو عملياتو کې ترې نیول شوې وې.
تیره میاشت د عطانور په مشرۍ زرګونو ملیشو د چمتال په ولسوالۍ کې داسې مهال عملیات پیل کړل چې وسلوال طالبان د ولسوالۍ نږدې سیمو ته رسیدلي و .
په عملياتو کې د سیمیزو اربکیانو تر څنګ د پارلمان او ولايتي شورا په ځينو غړو پورې اړوند وسله والو هم برخه اخيستې وه چې د عامو خلکو پر وړاندې په بې دریغه ظلمونه تورن شول او دځینو پښتون ټبره اوسیدونکو کورونه یې پدې پلمه چې ګواکې طالبانو ته شپې ورکوي ونړول او یو شمیر یې د لنډې مودې لپاره بندیان کړل .
سیمیز خلک وایي چې د دې ولسوالۍ د بارګاه، جرکلا، نوشهر عليزايي، بابړان، قلعه رزاق، نواباد او ګڼو نورو سيمو کې بېرته وسله وال طالبان ځای پر ځای شوي دي.
بلخوا د بلخ د امنیې قوماندانۍ وياند شېرجان دراني د چمتال د اوسیدونکو خبرې رد کړې او په وینایې چې دمګړۍ په چمتال ولسوالۍ کې د نظامي بېس او ځينو امنيتي پوستونو ساختماني چارې روانې دي.
خو سیمیز خلک وایي حکومت تر عملیاتو وروسته په ټولییزه توګه سیمې پریښې چې اوس پرې طالبان پوره واکمني لري.
