د افغانستان لپاره د روسیې د ولسمشر ځانګړی استازي، ضمیر کابلوف له ترکي اژانس ”الاناضول“ سره په مرکه کې ویلي چې د افغانستان لپاره د ډونالډ ټرمپ نوې ستراتیژي د بارک اوباما د غلطیو او اشتباهاتو تکرار دی او د افغانستان د وضعیت په ښه کولو کې هیڅ مرسته نه شي کولای.
ضمیر کابلوف د تېر په څېر یو ځل بیا ویلي چې افغانستان ته د نورو پوځیانو رالېږل به هیڅ ګټه ونکړي، نوموړی وايي، ”بارک اوباما افغانستان ته د ۳۰ زره پوځیانو په رالېږلو سره کوم څه ترلاسه نه کړل. اوس د امریکا نوی حکومت د ۳۹۰۰ پوځيانو په رالېږلو سره د کوم څه لاسته راوړل غواړي؟“
کابلوف د امریکايي چارواکو خبرو ته په اشارې سره ویلي چې پر طالبانو فشار اچول نه شي کولای چې د سولې خبرو ته یې اړ کړي.
د افغانستان او پاکستان لپاره د امريکا ځانګړې استازې ويلي چې طالبان به اړ باسو چې له افغان دولت سره د سولې خبرو ته حاضر شي. خو ضمیر کابلوف له ”الاناضول“ اژانس سره په خبرو کې زیاته کړې چې د سولې خبرو ته د کېناستلو لپاره پر طالبانو نظامي فشار راوړل، په افغانستان کې د امریکا د ستراتیژۍ د ماتې نښه ده.
کابلوف همداراز ویلي تر نامعلومې مودې پورې په افغانستان کې د امریکا پوځي شتون، په دې هېواد کې جګړه او د ملکي وګړو تلفات زیاتوي. کابلوف وروسته ویلي ”د دې خبرو د اثبات لپاره زیات انتظار ته ضرورت نشته. د ټرمپ د نوې ستراتیژۍ له اعلان لږ وروسته امریکا په هرات او لوګر کې ۲۶ ملکي وګړي او همداراز په کابل کې ۲ عام خلک په بمباریو کې ووژل. “
د افغانستان لپاره د روسیې ځانګړي استازي په وار وار ویلي چې په افغانستان کې د امریکا ټولې هڅې او کوښښونه له ماتې سره مخ شوي دي، اوس نه شي کولای د څو زره پوځیانو په رالېږلو سره د افغانستان وضعیت کنټرول کړي. نوموړی وايي امریکا په افغانستان کې د اوسني حکومت د روان ساتلو لپاره د سرتېرو شمېر زیاتوي. ”د دې لپاره چې وضعیت خراب نه شي د سرتېرو شمېر زیاتېږي تر څو دا پروژه [افغان حکومت] روانه وساتل شي“.
