شپږيزه کرکټ: د کابل بازانو د بست ساتونکو ته ماتې ورکړه
(کابل ټکی کام ۱۳۹۶وږی ۲۰): نن د افغانستان د کرکټ شپږيزه لیګ د پنځم پړاو لومړۍ لوبه د کابل بازانو لوبډلې او بست ساتونکو تر منځ ترسره شوه، چې د کابل بازانو بست ساتونکو ته ماتې ورکړه.
د بست ساتونکو په ټاکل شويو شلو اورونو کې د اوو لوبغاړو په سوځېدو سره کابل بازانو ته ۱۳۷ منډو هدف وټاکه.
د کابل بازانو لوبډلې ورکړل شوی هدف په اوولس اورونو کې د دوو لوبغاړو په سوځېدو سره پوره کړ او بريا يې خپله کړه.
د کابل بازان لوبغاړی اصغر ستانکزی غوره لوبغاړی وټاکل شو، چې په ۳۵ توپونو يې ۷۲ منډې جوړې کړې.
د کرکټ د شپږیزه لیګ سیالۍ پرون ناوخته د افغانستان د ۶ زونونو د لوبډلو په ګډون سره پرانېستل شوې.
ننۍ لوبې ته د کرکټ ګڼ شمير مينوال راغلي خو د کرکټ بورډ مسئولين وايي ښايي د وروستيو لوبو نندارې ته د نندارچيانو تعداد زيات شي.
د افغانستان د کرکټ بورډ چارواکي وایي چې سږکال شاوخوا ۳۰ بهرني لوبغاړي، روزونکي او څارونکي هم په دغو سیالیو کې برخه اخلي.
د کابل بازانو لوبډلې مشر د ملي لوبډلې کپټان اصغر ستانکزی دی او د جي پي تجارتي شرکت یې مالی ملاتړ کوي، له اصغر سره په لوبډلې کې د افغانستان ملي لوبډلې او ځینې نور بهرني لوبغاړي هم لوبیږي.
د افغانستان د ملي لوبډلې مشهور لوبغاړی شاپور ځدراڼ د بست ساتونکو لوبډلې مشر دی. بست ساتونکو لوبډله د افغانستان د ملي لوبډلې او ځینو بهرنیو لوبغاړو جوړه ده.
بست ساتونکي د شپږیزې لیګ سیالیو کې د افغانستان د جنوبي ولایتونو نمایندګي کوي. افغان سوداګر علي ارشد د دغې لوبډلې مالي ملاتړی دی.
