(کابل ټکی کام ۱۳۹۶وږی ۲۲): د الجزيرة د راپور پر بنسټ د سعودي عربستان حکومت د دغه هېواد دولس ديني عالمان نيولي، چې په هغې کې دوه تنه مشهور ديني عالمان او دعوتګر شيخ سلمان العوده او شيخ عائض القرني هم شامل دي.
ويل کېږي د يو شمير ديني عالمانو نيول د مسلمان امت په اړه د هغوی د يووالي څرګندونې او په سعودي حکومت نيوکې کول دي.
د سعودي رسنيو او د دغه هېواد د ټولنيزو شبکو فعالانو ويلي، چې سعودي عربستان په دې وروستيو کې لږ ترلږه شل ديني عالمان بنديان کړي دي، چې له جملې يې مشهور دعوتګر او ديني عالم سلمان العودة، عائض القرني، علي العمري، فهدالسنيدي، محمدعبدالعزيزالخضيري، ابراهيم الحارثي، غرم البيشي، محمد الهبدان، يوسف الاحمد، ابراهيم الناصر، محمد بن موسی الشريف او يو شمير نور هم شامل دي.
د سعودي حکومت چارواکو تر دې دمه د يادو علماؤ د نيولو په اړه رسماً څه نه دي ويلي.
د سعودي عربستان په ګډون په ځينو عربي هېوادونو کې د بيان پر ازادۍ په ځانګړې ډول د علماؤ په بيانونو بنديزونه لګېدلي او د حکومت له رسمي دريځ پرته چاته اجازه نه ورکول کېږي، چې خپل نظر څرګند کړي.
