(کابل ټکی کام ۱۳۹۶ وږی ۲۲ فرید افغان)
ملګري ملتونه وایي د ان سانګ سوچي په مشرۍ د برما پوځیان د روهنګیایي مسلمانانو نسل وژنه کوي او دا ورته د منلو وړنده.
په ملگرو ملتونو کې د بشري حقونو عالي کمیشنر زید رعدالحسن وویل د برما بودایان د مسلمانانو د قومي تصفیې تکل لري او په وینا یې چې برما دې هرڅومره ژر دا کار ودروي.
نوموړي د برما د چارواکو داخبره چې گواکې روهینگیایان پخپله خپلو کورونو او کلیو ته اور اچولی. دا د حقیقت نه سترگې پټول بللي او په وینا یې چې دا ډول خبرې نړیوال اعتماد ته د داسې یوه هیواد له خوا تاوان رسول دي چې د نړیوالو له ښه حسن نیت یې گټه اخیستې ده.
د حسن له خبرو وروسته برتانیې او سویدن د ملګرو ملتونو بیړنۍ غونډه راغوښتې او ټاکل شوې ده چې نن د چهارشنبې په ورځ (سپتمبر ١٣) ترسره شي ترڅو د برما په وروستي تاوتریخوالي یوه توافق ته ورسیږي.
په همدې مهال تیره ورځ د بنگله دیش صدراعظمه شیخ حسینه هم د کوکس بازار ته چې د برمایي کډوالو تر ټولو لوی پنډغالی دی ورغلې وه او له برما یې وغوښتل چې د خپل هیواد اقلیت مسلمانانو ته خوندي ځایونه جوړ کړي.
خو برما ویلي؛ هر څوک چې خپل برمایي تابعیت ثابتولی شي، هغوی کولای بیرته ستانه شي پداسې حال کې چې غوڅ اکثریت روهینیگیایان د برما تابعیت نلري.
د برما تاوتریخوالی د تبت د بودایانوتبعید شوي مذهبه روحاني مشر، دایله لاما او د جنوبي افریقا اعظم اسقف هم غندلی او له برما یې د بیړني اقدام غوښتنه کړې.
خو چین بیا پر مسلمانانو د برمایي پوځ بریدونه توجیه کړي او هغه یې ښه اقدام بللی
د دې هیواد د بهرنیو چارو وزارت ویاند گینگ شنگ په بیجینگ کې خبریالانو ته وویل چې حکومت یې په راخین ولایت کې د سولې او ثبات په راوستلو کې د برما د هڅو ملاتړ کوي.
په ورته وخت کې د امنیت شوار غړیو د هغو تورونو پر وړاندې چې ګواکې دا شورا د برما په مظالمو سترګې پټوي د تړلو دروازو تر شا غونډه کړې چې جزیات یې ندي خپاره شوي.
د ملګرو ملتونو د معلوماتو له مخې پدې تیرو شاوخو دریو اونیو کې چې د روهینګیایي مسلمانانو په سره تشدد پیل شوی، تر اوسه ۳۷۰ زره مسلمانان بنګلادیش ته کډه کیدو ته مجبوره شوي. دغه اداره وایي چې هره ورځ په اوسط ډول پنځه ویشت زره روهینګایي مسلمانان د برما نه بنګلادیش ته کډه کوي او د ۴ زرو په شاوخوا کې مسلمانان وژل شوي دي.
.
