(کابل ټکی کام ۱۳۹۶ وږی ۲۲ فرید افغان)
د عدلیې وزارت وایي، په دې وروستیو کې یې زیات مراجعین هغه کسان دي چې غواړي بهر ته د تللو په موخه آن خپله د افغان تابعیت تذکره هم لغوه کړي.
وزارت وایي، دا خلک غواړي ترڅو د تل لپاره په بهر میشتو هیوادونو کې ژوند ولري او د همدې کار لپاره ځینې هیوادونه دوه ګونی تابعیت نمني، چې د لاچارۍ له کبله داکسان هم غواړي ترڅو د افغانستان ورکړل شوې د تابعیت تذکره لغوه او پرځای یې نورو هیوادونو ته ځان منسوب کړي ترڅو د هغه هیواد د تابعیت سند ترلاسه کړي.
د عدلیې وزارت ویاند امان ریاضت رسنیو ته ویلي چې د سږکال په لومړیو شپږ میاشتو کې ورته د تابعیت د پریښودلو شاوخوا پنځه سوه غوښتنلیکونه سپارل شوي چې پکې په ایران او هالنډ کې میشت افغانان یې د لیست په سر کې ځای لري.
د عدلیې وزارت د شمیرنو له مخې د ۵۰۷ تنو افغانانو څخه چې د خپل تابعیت د پریښود لو غوښتنې یې کړي ۲۳۳ په ایران، ۱۷۷ په هالنډ، ۳۱ په اوکراین، ۲۰ په اتریش او ۱۵ په قزاقستان کې اوسیږي.
د دې وزارت ویاند زیاتوي چې د روان هجري شمسي کال په لومړیو شپږ میاشتو کې یوازې لس تنو د افغان تابعیت د اخیستلو لپاره عدلیې وزارت ته خپل غوښتنلیکونه سپارلي دي چې په کې د پاکستان، ترکیې، هند، چین او فرانسې وګړي شامل دي.
د افغانستان د قوانینو له مخې د تابعیت د پریښودلو او یا هم اخیستلو غوښتنلیکونه د قانوني پړاونو له تیرولو وروسته د جمهوررئیس په مشرۍ د کابینې په غونډه کې رد او یا هم تائیدیږي
باید وویل شي چې پدې وروستیو کې له افغانستان څخه د کډوالو په تګ کې ډیروالی راغلی او روزانه سلګونه ځوانان د اروپایي هیوادونو یا هم عربي نړۍ په تکل له هیواد څخه وځي چې دې چارې حکومت هم له وارخطایي سره مخ کړی.
له بلې خوا د افغان دولت لخوا ځینې لیږل شوي محصلین، او د نظامي زدکړو منسوبینو په بهر کې د پاته کیدو په موخه د تیښتې هڅه کړې ده.
ځوانان د دې کار لامل بې روزګاري ښیي او په وینا یې چې لاچاري او غربت اړ کړي ترڅو د کاروبار په لټه بهرنیو هیوادونو ته سفر وکړي.
شنونکي وایي چې د ګډحکومت د کمزوري بهرني سیاست له امله غوڅ اکثریت ځوانان په بهر نړۍ کې له ستونزو سره لاس اوګریوان دي چې په وینا یې د نورې نړۍ چارواکي او عادي خلک آن د انسانیت په نظر هم ورته نه ګوري او د ډول ډول شاقه کارونو او نور مشکلاتو سره لاس اوګریوان دي چې حکومت یې تر اوسه هیڅ غږ ندی اوریدلی .
