(کابل ټکی کام ۱۳۹۶ وږی ۲۳ فرید افغان)
د ملیټري په نامه یوې امریکایي نشریې راپور ورکړی چې امریکایانو په افغانستان کې د وسلوالو ډلو پرضد ۵۰۰ بیلابیل ډوله وسلې کارولې او آزمویلې دي تر څو وکولای شي له یوې خوا خپل مخالفین وځپي له بل پلوه د خپلو وسلو د ښه کارولو آزموینې ترسره کړي.
یاده نشریه د امریکا د هوایي ځواکونو د لوی درستیز ډیویډ ګولډفین له قوله خبر ورکوي چې ویلي یې دي،‹‹ موږ د ستراتیژي د بشپړ پلان د پلي کېدو لپاره هلې ځلې کوو››
د ملټیري په خبره چې امریکا له ۲۰۱۲ کال وروسته دومره ستر بریدونه نه وه کړي او نه یې په دومره پراخه کچه وسلې کارولې وې لکه یواځې د تیرې یوې میاشتې په اوږدو کې.
خپرونه لیکي چې د اګست په میاشت کې امریکایي ځواکونو د طالبانو، القاعده او داعش پرضد تر پنځه سوه ډوله زیاته وسله کارولې ده.
سیاسي فعال او د ویسا ورځپاڼې مسؤل مدیر زبیر شفیقي وایي چې ‹‹په حكومت كې نه دومره شهامت شته او نه اراده چې پردیو پرضد د ولس لپاره محور شي››
نوموړی زیاتوي ، ‹‹هغه خلک چې امریکایي وحشت ته څڼې اچوي هغوی به لكه د روسانو بدرګه كوونكي چې ولس ته خړ سترګي شول. د امريكايي وحشت پلويان به هم يو وخت ښكته ګوري او دغه د اوس مهال مستۍ به يې هېڅكله پاتې نشي››
باید وویل شي چې د اګست په میاشت کې امریکایي چارواکو د افغان جګړې په اړه د خپل هیواد پالیسي اعلان کړه چې له مخې به یې تمرکز یواځې په جنګ ور ټول وي.
تیره ورځ امریکایي رسنيوخبر خپور کړ چې یواځې په تیرو څو میاشتو کې د ایف ۱۶ فالکون« جنګي الوتکو او «ایم کیو-۹- ریپر» بې پیلوټه الوتکو په مټ په افغانستان کې ۲ زره لوی بمونه غورځول شوي چې سلګونو افغانانو ته یې مرګ ژوبله اړولې.
داشمیره د تیر ټول کال په پرتله دوه برابره زیاته شوې.
د یادونې وړ ده چې پدې وروستیو کې دامریکا د نوې پالیسي سره سم هوایي بریدونه بې مخینې زیات شوي دي چې دې چارې د عامو افغانانو غبرګونونه هم راپارولي .
د یادو بریدونو ځیني قرباني ولسي وګړي وایي چې که امریکایي ځواکونه همداسې خپلو ړندو بمباریو او بریدونو ته زور ورکړي دوی به د وسلوالو مخالفینو تر څنګ د هغوی پرضد ودریږي.
په هرات، لوګر، ننګرهار، کندوز، هلمند او ګڼو نورو ولایاتو کې د بیلابیلو بریدونو،بمباریو او شپینیو چاپو له امله تر ۳۰۰ زیات ولسي افغانان وژل شوي او سلګونه نور ټپیان دي.
چې هیڅ کوم نړیوال او داخلي بنسټ یې تر اوسه نه غندنه کړې او نه یې هم محکوم کړي دي
