(کابل ټکی کام ۱۳۹۶وږی ۲۵): د امريکايي ورځپاڼې نيويارک ټايمز د راپور له مخې د امریکا د مرکزي استخباراتو ادارې د ولسمشر ټرمپ څخه غوښتي چې د افغانسان او پاکستان د کرښې دواړو غاړو ته د بې پيلوټه الوتکو د بريدونو اجازه ورکړي.
د سرچينې په وينا، که ولسمشر ټرمپ سي آی ای ته د بې پيلوټه الوتکو د کارولو اجازه ورکړي، نو دا به په افغانستان او سيمه کې په ښکاره لومړی ځل وي چې سی آی ای د القاعده او نورو ډلو پر خلاف بريدونه ترسره کړي.
نيويارک ټايمز ليکي، چې سي آی ای به په خپلو دغو بريدونو کې ډيره پاملرنه په افغانستان کې د حقاني وسله والې ډلې ته کوي او هغوی به هدف ګرځوي.
ورځپاڼې پر امريکايي ځواکونو د امريکا د پخواني ولسمشر بارک اوباما د حکومت ځينې محدوديتونو ته په کتو ويلي، چې په جګړه کې د هغه د دورې محدوديتونو د وسله والو پرضد د امريکا لاسونه تړلي و.
ورځپاڼې زياته کړې، چې له لسو کلونو راپديخوا امريکا په پاکستان کې په پټه د بې پيلوټه الوتکو بريدونه کوي، چې هيڅکله هم د دواړو هېوادونو چارواکو پرې اعتراف نه دی کړی.
د نيويارک ټايمز په خبر کې راغلي، چې پاکستان امريکا ته پر خپله خاوره د بريدونو اجازه ورکړې، خو شرط يې پرې دا ايښی چې هيڅکله به پر کېدونکو يا شويو بريدونو اعتراف نه کوي.
