(کابل ټکی کام ۱۳۹۶وږی ۲۹): په امريکا کې يوه تازه نظر پوښتنه ښيي چې څلوېښت سلنه امريکايان په دې باور دي چې امريکايي ځواکونه په افغانستان کې جګړه بايلي.
د هيل نشريې په يو راپور کې ويلي، چې ۴۱ سلنه امريکايانو په افغانستان کې د امريکا د نظامي حضور سره مخالفت څرګند کړی او زياتوي چې ۴۵ سلنه امريکايانو يې ملاتړ کړی.
په راپور کې راغلي، چې ۴۱ سلنه امريکايانو د رد رایه ورکړې او پاتې ۱۴ سلنه خلکو بیا په دې اړه هیچ نه دي ویلي.
دغه راز په نظر پوښتنه کې ليکل شوي، په امريکا کې جمهوري غوښتونکو تر ديموکراتانو د افغانستان په اړه د ټرمپ د تګلارو ډير ملاتړ کړی دی.
د نظرپوښتنې پر بنسټ ۲۴ سلنه امريکايان په دې نظر دي چې امريکايي ځواکونو د افغانستان جګړه ګټلې خو څلوېښت سلنه بيا په دې باوري دي چې امريکا به افغان جګړه بايلي او په دغه هېواد کې به له ناکامۍ سره مخ کېږي.
