کابل: د جنايي جرمونو پرضد د مبارزې پر رييس وسله وال بريد شوی
(کابل ټکی کام ۱۳۹۶وږی ۳۰): د راپورونو له مخې تېره شپه په کابل ښار کې د کورنيو چارو وزارت د جنايي جرمونو پرضد د مبارزې پر رييس جنرال سالم احساس وسله وال بريد شوی.
د دغه رياست چارواکي وايي، چې پېشه تېره شپه دولس نيمې بجې په کابل ښار کې رامنځته شوې ده.
ويل کېږي، نوموړي د بريد پر مهال په خپل موټر کې شتون درلود او له دې بريده روغ وتلی، خو دوه تنه ساتونکي يې مرګوني ټپيان شوي دي.
په دې وروستيو کې د کابل ښار په ګډون د هېواد په يو شمير ښارونو کې جنايي پېښې او وسله وال بريدونه ډېر شوي، چې د خلکو اندېښنې يې زياتې کړي دي.
تر اوسه د دغه بريد مسئوليت کومې وسله والې ډلې په غاړه نه دی اخيستی.
