د اخوان المسلين پخوانی مشر د مصر په زندان کې وفات شو
(کابل ټکی کام ۱۳۹۶تله ۱): د ورکړل شويو راپورنو پر اساس د اخوان المسلين پخوانی مشر مهدي عاکف د ۸۹ کلونو په عمر د مصر په يو زندان کې وفات شوی دی او ځينو رسنيو ويلي چې د مصر حکومت د هغه د جنازې خښولو اجازه نه ورکوي.
د مهدي عاکف يوه مدافع وکيل عبدالمنعم عبدالمقصود د ترکيې رسنيو ته ويلي، چې د نوموړي روغتيايي وضعيت له تېرو څو مياشتو راهيسې خراب و.
الجزيرې ټلويزيوني شبکې ويلي، چې امنيتي ځواکونه د مهدي عاکف د جنازې اجازه نه ورکوي، خو د هغه پلويان بيا وايي چې حکومت ورته د شپې له خوا د لږو کسانو د ګډون کولو امر کړی، ترڅو جنازه يې خاورو ته وسپاري.
د اخوان المسلمين له دفتره په خپره شوې خبرپاڼې کې راغلي: «د مرشد د مړينې پړه پر حکومت ده، په داسې حال کې، چې روغتيايي وضعيت يې له تېرې اوږدې مودې راهيسې خراب و، خو حکومت بيا هم د درملنې لپاره اجازه نه ورکوله.»
په خبرپاڼه کې د اخوان المسلمين له پلويانو غوښتنه شوې چې د هغه غايبانه جنازه وکړي او سبا د يکشنبې په ورځ په استانبول ښار کې د هغه د فاتحې اخيستلو اعلان يې کړی.
مهدي عاکف د اخوان المسلين اووم مرشد او مشر و، چې په ۲۰۱۳م کال کې د جنرال عبدالفتاح سيسي له لوري د ولسمشر محمد مرسي پر ضد د کودتا پر مهال له زرګونو نورو کودتاچيانو سره نيول شوی و، چې محکمې ورته د ۲۵ کلونو بند سزا ورکړې وه.
نوموړی په ۱۹۵۴ کال کې هم زنداني شوی و، چې له شل کاله بند تېرولو وروسته بيرته خوشې او له هغې وروسته د حسني مبارک د واکمنۍ پر مهال هم يو ځل زنداني شو چې له يو څه مودې تېرولو وروسته بېرته خوشې شو.
