ننګرهار: شپنيو عملياتو کې پنځو ولسي وګړو ته مرګ ژوبله اوښتې
(کابل ټکی کام ۱۳۹۶تله ۳): تېره شپه د ننګرهار ولايت په سرخرود ولسوالۍ د ککړک او ټټنګ سيمو کې بهرنیو او افغان ځواکونو عمليات کړي، چې په ترڅ کې يې پنځو ولسي وګړو ته مرګ ژوبله اوښتې ده.
د ککړک د سيمې يو تن اوسېدونکي بشيرجان کابل ټکی کام ته وویل، چې تېره شپه ناوخته ګډو ځواکونو د دوی پر کلي عمليات وکړل، چې پکې د ښځو او ماشومانو په ګډون پنځه تنه ولسي وګړو ته يې مرګ ژوبله واړوله.
نوموړی وايي، په دغو عملياتو کې دوه تنه عام کليوال شهيدان شوي او د دوو ماشومانو په ګډون يوه مېرمنه ټپيان دي.
هغه زياته کړه، چې عملياتو ته ورغليو عسکرو د ځينو کورونو قيمتي شيان او پيسې هم له ځان سره وړي دي.
په دې وروستيو کې د ګډو ځواکونو شپني عمليات زيات شوي، چې تر ډېره يې قربانيان ولسي وګړي دي.
تر دې دمه په دې اړه دولت او يا هم بهرنيو ځواکونو څه نه دي ويلي.
