غني د بلک هاک هلیکوپټرو د تسليمۍ لپاره کندهار ته ځي
(کابل ټکی کام ۱۳۹۶تله ۱۵): ټاکل شوې ده چې نن د شنبې په ورځ افغان ولسمشر اشرف غني د د بلک هاک په نوم د امريکايي هليکوپټرو د تسليمۍ لپاره کندهار ته ولاړ شي.
د کندهار ولايت مطبوعاتي دفتر سرپرست فضل الباري بريالي رسنيو ته ويلي، چې ولسمشر به د خپل سفر په جريان کې په کندهار کې د افغانستان زراعتي پوهنتون کې ولسي خلکو ته وينا هم وکړي.
او په وینا يې چې له غرمې وروسته به د کندهار په هوايي لوا کې د امريکايي بلک هاک هلیکوپترو تسليمي هم وکړي.
د افغانستان د دفاع وزارت ویاند دولت وزیري ويلي، چې امریکا د افغان هوايي ځواک د پیاوړتیا لپاره ځانګړې بودجه په پام کې نیولې چې له مخې به یې په روان کال کې څلور بلک هاک هلیکوپټرې افغان ځواکونو ته وسپارل شي.
ټاکل شوې وه چې د يو تړون له مخې امريکا د افغانستان هوايي ځواکونو ته روسي (MI-17) هليکوپترې واخلي خو د روسيې او امريکا ترمنځ د اړيکو تر خرابېدو وروسته دغه تړون لغوه او امريکا د افغان هوايي ځواک لپاره د(UH-60s) هليکوپترو په پيرولو پيل وکړ.
ويل کېږي، امريکا افغانستان ته دغه ډول ۱۵۹ هليکوپترې ورکوي.
د تېرې مياشتې په نوولسمه نېټه د بلک هالک هليکوپترو لومړۍ جوپه کندهار ته ورسېده، چې نن به په رسمي ډول افغان لوري ته وسپارل شي.
د افغانستان په اړه د ټرمپ د نوې تګلارې له اعلان وروسته امريکا يوځل بيا په هېواد کې د نظامي حضور د پراختيا هڅې پیل کړي، د زرګونو سرتيرو د بيا راوستلو پريکړه يې وکړه او دغه راز د نويو وسلو په استعمالولو يې پیل وکړ او خپلو پوځي عملياتو کې يې زیاتوالی راوست، چې د شنونکو په باور ښايي له دې سره په هېواد کې د ولسي خلکو مرګ ژوبله نوره هم لوړه او جګړه لسيزو ته اوږده شي.
