کابل: د قاطع ملاتړ په مرکزي قوماندانۍ توغندي لګېدلي
(کابل ټکی کام ۱۳۹۶تله ۲۹): په کابل ښار کې نن سهار يو ځل بيا د درنو چاودنو غږ اورېدل شوی دی.
د ورکړل شويو راپورونو پر بنسټ، په وزير اکبرمېنه کې دوه راکټونه لګېدلي دي.
خو له بله پلوه د وسله والو طالبانو وياند ذبيح الله مجاهد په خپله رسمي ټويټرپاڼه ليکلي، چې نن سهار يې په کابل کې د قاطع ملاتړ پر مرکزي قومندانۍ او ځينې نورو نظامي برخو توغندويي بريدونه کړي دي.
تر اوسه د اوښتو تلفاتو په اړه کره معلومات نه دي ورکړل شوي، خو طالبان وايي په دغه بريدونو کې قاطع ملاتړ قوماندانۍ ځېنې برخې لګېدلي او درانه تلفات يې اړولې دي.
د کابل امنيتي مسئولينو په دې اړه څه نه دي ويلي.
د يادونې ده، چې تېر ماښام په دکابل په دشت برچي کې د شيعه ګانو د يوه مسجد په داخل کې د داعش وسله والو پورې اړوند يوه بريدګر ځان ته چاودنه ورکړه، چې نږدې پنځوس کسانو ته يې مرګ ژوبله واړوله.
