پاکستان په افغاني محصولاتو درې برابره ماليه لوړه کړه
(کابل ټکی کام ۱۳۹۶تله ۲۹): پاکستان له افغانستان څخه د سبزيو، لبنياتو، وچو او تازه ميوو په وارداتو درې برابره ماليه لوړه کړه.
د افغانستان د سوداګرۍ خونې چارواکي وايي، چې پاکستان پر لسګونه قلمه افغاني محصولاتو ګمرکي ماليه درې برابره لوړه کړې ده.
د سوداګرۍ خونې مرستيال خان جان الکوزي رسنيو ته ويلي، چې پاکستان د تلې له ۲۵ وروسته دغه قانون پلی کړی، چې له کبله يې افغان سوداګرو ته مالي زيانونه اوښتي دي.
نوموړی وايي، د پاکستان د حکومت دغه چاره په افغاني صادراتو منفي تاثير کولی شي.
ويل کېږي، چې نړيوال بانک د افغانستان د مخ پر زوړ اقتصاد اندېښنه ښودلې او د شنونکو په باور که د هېواد روان اقتصادي وضعيت همداسې دوام پيدا کړي، ښايي د پيسو له نړيوال بانک څخه يو ځل بيا قرض اخيستلو ته مجبور شي.
داسې راپورونه هم شته، چې د ضعيف اقتصاد پر سر د ځينو لوړپوړو چارواکو تر منځ ترخې خبرې هم تبادله شوي دي.
