امریکا غواړي افغانستان د لویو قدرتونو سره د جګړې د ډګر په توګه وکاروي:
(کابل ټکی کام ۱۳۹۶ تله ۳۰ فرید افغان)
د هیل په نامه یوې امریکایي نشریې تیره ورځ په خپله ګڼه کې د یوه امریکایي شنونکي ‹‹جیسون ام برودسکي›› چې د سیمې په چارو ژور نظر ساتي، لیکنه خپره کړې وه.
په لیکنه کې راغلي چې امریکایان په لوی لاس غواړي چې افغانستان کې سیمیز رقابتونه راوپاروي او افغانستان د سیمیزو قدرتونو د لوبې په ډګر بدل کړي .
د نوموړي په خبره؛ د تهران او نړیوالو ترمنځ شوي تړون چې اوس یې امریکا د لغوه کولو خبرې کوي، دې ته لاره هواره کړې چې په افغانستان کې تهران او مسکو امریکایانو ته ستونزې جوړې کړي او د امریکا ضد جګړه نوره هم پراخه کړي.
نوموړی زیاتوي چې د امریکایان هر فرمایش منل او د افغان حکومت لړزانده سیاست ښایي افغانستان د سیمیزو قدرتونو د زور آزمویلو په ډګر بدل کړي.
چې قرباني به یې یواځې افغانان وي او ګټې به یې دا هیوادونه ترلاسه کوي.
د ده په خبره د افغانستان د روانې غمیزې لوی لامل په افغانستان کې د امریکا نظامي شتون ده چې افغانستان ته یې هیڅ ستراتیژیکه ګټه نشته.
بلخوا د سیاسي چارو افغان شنونکي غلام جیلاني ځواک رسنیو ته ویلي چې د سیمې هېوادونه داعش ډله د سیمې د امنيت لپاره یو ګواښ ګڼي او امریکا بیا د همدې ډلې ملاتړ کوي، نو د دې ډېر امکان شته چې روسیه او ایران به په غبرګون کې په نورو لارو غور وکړي او روانه جګړه به نوره هم اوږده شي.
