طالبانو په غزني او پکتیکا کې د حکومت ادعاوې رد کړې:
(کابل ټکی کام ۱۳۹۶ تله ۳۰ فرید افغان)
تیره ورځ د غزني چارواکو رسنیو ته وویل چې د اندړو په ولسوالۍ کې یې لسګونو طالبانو ته مرګ ژوبله اړولې ده او تر څنګ یې ولسوالۍ یې هم له سقوط څخه ژغورلې ده.
د غزني والي عبدالکریم متین په وینا چې افغان ځواکونو پدې جګړه کې شاوخوا ۹۳ وسلوال طالبانو وژلي چې درۍ یې مهم قوماندانان او یو شمیر یې پاکستانیان دي .
طالب ویاند ذبیح الله مجاهد په یوه خبر پاڼه کې د دولتي ځواکونو دا ادعاوې رد کړې او هغه یې افواهات بللي دي. نوموړی وایي ‹‹داندړو په ټوله جګړه چې لسګونه عسکر په کې ووژل شول یواځې ۷ تنه طالبان وژل شوي او ۷ نور ټپیان دي.
نوموړی د پاکستانیانو د وجود ادعا خندونکې افترا بولي ا وزیاتوي؛ ‹‹هیوادوال باید متوجه وي چې تل په څير مزدور دښمن له خپلو درنه تلفاتو وروسته، په کاذب ډول د مجاهدینو د تلفاتو آوازې او پروپاګند خپروي.››
بلخوا طالب ویاند هغه راپورونه چې ګواکې دې ډلې ته د پکتیکاپه ولایت کې د سر دروند زیان اوښتی ردوي او په وینا یې چې په پکتیکا یې دولتي ځواکونو ته دروند ځاني او مالي زیان اړولی خو له خپل اړخه کوم تلفات نلري.
د نوموړي په خبره؛ ‹‹دا ادعاوې د حکومت وارخطایي ښیي››
باید وویل شي چې روانه اونۍ د افغان ځواکونو لپاره تر ټولو خونړۍ هغه وه چې سلګونو افغان عسکرو ته پکې مرګ ژوبله واوښته.
