د ”۱۳ بهرنیو عسکرو وژونکی“ افغان سرتېری خاورو ته وسپارل شو
د سېلاب قول اردو هغه افغان سرتېری، چې پنځه ورځې وړاندې یې په سېلاب قول اردو کې دننه پر بهرنیو عسکرو ډزې کړې وې او مرګ – ژوبله یې ورته اړولې وه، تېر ماښام خاورو ته وسپارل شو.
د یاد نفوذي سرتېري نوم ذبیح الله و او د ننګرهار د خوږیاڼیو د ټټنګ پتو کلي اوسېدونکی و، چې جنازه یې پرون ماښام شاوخوا ۷ بجې یې په خپل پلرني کلي کې د سلګونو خلکو په شتون کې ترسره شوه او خاورو ته وسپارل شو.
دغه نفوذي عسکر له ډيرې مودې را په دې خوا په سیلاب قول اردو کې دننه دنده ترسره کوله او بالاخره یې، پنځه ورځې وړاندې د خپل ټوپک شپېلۍ په یاده قول اردو کې پر مېشتو بهرنیو ځواکونو ورواړوله. وروسته برید کوونکی سرتېری ذبیح الله هم د نورو افغان عسکرو لخوا په شهادت ورسېد.
د طالبانو ویاند، ذبیح الله مجاهد وايي، ”یاد نفوذي عسکر پنځه ورځې وړاندې (2017/10/22) د لغمان ولایت، ګمبیري ډاک، سېلاب قول اردو کې دننه په امریکايي اشغالګرو عسکرو داخلي برید وکړ چې له امله
يې ۱۳ اشغالګر افسران او عسکر ووژل او ۲ نور ټپيان کړل.“
که څه هم په افغانستان کې مېشت بهرني ځواکونو قومندانۍ د طالبانو خبره رد کړه او ویې ویل چې داسې کومه پېښه نه ده رامنځته شوې خو په یاده قول اردو کې یو داخلي مسئول منلې چې له امریکايي عسکر سره د یو افغان عسکر شخړه راغلې.
په افغانستان کې بهرني ځواکونه زیاتره وخت د خپلو تلفاتو معلومات پټوي او یا یې هم له سره مني نه.
یوه اونۍ وړاندې هم په کابل کې یوه افغان سرتېري ۵ بهرنیو عسکرو ته مرګ اړولې وه خوهغه پېښه پټه پاتې شوه.
ذبیح الله مجاهد د بهرنیو ځواکونو له لوري د پیښې پټولو لامل دا ښيي چې، ”امریکايي ولس له دغه راز برید څخه خبر نشي او د ټرمپ د جنګي ستراتيژۍ په وړاندې امریکايي ذهنیت را ونه پارېږي.“
