هند افغانستان ته د چاه بهار له لارې ۱۱۰زره مټرېک ټنه غنم راولېږل
(کابل ټکی کام ۱۳۹۶لړم ۸): هند تېره ورځ د چاه بهار بندر له لارې افغانستان سره د مرسته شويو غنمو لومړنۍ کښتۍ راولېږله.
په هندوستان کې د افغانستان سفير شيدا محمد ابدالي رسنيو ته ويلي، چې په دغې کښتۍ کې ۱۱۰زره مټرېک ټنه غنم بار دي.
هندي چارواکي وايي، له افغانستان سره د هند مرسته شوي غنم به په شپږو پړاوونو کې د ايران له چابهاره افغانستان ته ولېږدول شي.
د افغانستان حکومت پاکستان سره د سیاسي اړیکو له ترينګلتیا وروسته، هڅې لا ګړندۍ کړې چې د افغانستان د سوداګریزو اړتیاو لپاره نوې لارې پرانیزي.
تېر کال افغانستان، هند او ایران د چابهار بندر له لارې د همکارۍ تړون لاسلیک کړ ، چې له هغې وروسته دا لومړی ځل دی چې هند د سمندر او ځمکې له لارې افغانستان ته خوراکي توکي لېږدوي.
افغان سوداګرو له دې مخکې ډيری سوداګريز توکي د پاکستان د کراچۍ بندر له لارې واردول خو په دې وروستيو کې دغې هېواد افغانستان ته د مالونو په وارداتو او صادراتو کې ځينې خنډونه رامنځته کړل، چې اوس ډیری افغان سوداګر د چاه بهار بندر او نورو بديلو لارو افغانستان ته توکي واردوي.
