(کابل ټکی کام ۱۳۹۶لړم ۱۶): د نيمروز ولايت چارواکي وايي، چې هره ورځ د بې روزګارۍ او نا امنۍ له امله د دغه ولايت له لارې سلګونه کسان خپل هېواد پرېږدي او نورو هېوادونو ته ځي.
په نيمروز کې يوې دولتي سرچينې پژواک ته ويلي، چې هره ورځ څه باندې دوه زره کسان چې ډیری يې ځوانان دي د نيمروز له لارې هېواد پرېږدي.
د سرچينې په وینا: (دوى په قاچاقي ډول پاکستان او بيا يې ځيني ايران او ځيني ترکيې ته ځي. د دوى ٥٠ سلنه کورنۍ هم دي چې د نا امنۍ، بېوزلۍ او وزګارتيا له امله يې په ډله ييز ډول د هېواد پرېښودو ته مخه کړې ده.)
سرچينه زياتوي، چې په دغو کسانو کې ځينې يې تر خپل منزله رسېږي، ځينې کسان بيا په لاره کې خپل ژوند له لاسه ورکوي او ځينې نور بيا د پوليسو له لوري نيول کېږي او هېواد ته بېرته راړول کېږي.
شېراحمد چې په ناقانونه ډول ايران ته خلک لېږدوي، وايي اکثره کسان چې له هېواده وځي، د هېواد د شمالي ولايتونو لکه فارياب، سرپل، تخار او کندوز اوسېدونکي دي.
په ورته وخت کې بهرنيو هېوادونو ته تلونکي هېوادوال وايي، چې دولت ورته د کار زمينه نه ده برابره کړې، جګړې ورځ تربلې زياتېږي، د مجبورې ورځې نورو هېوادونو ته مخه کوي.
د فارياب د قيصار ولسوالۍ يوه اوسېدونکی نقیب الله وايي، چې د نا امنۍ او وزګارتيا له امله هېواد پرېښودو ته اړ شوى، که څه هم دې موخې ته رسېدل اوږد وخت غواړي او له ستونزو ډک سفر دى، خو بله چاره هم نشته، په هېواد کې نه امنيت شته او نه کار.
په هېواد کې وروستيو نا امنيو، اداري فساد او بې روزګارۍ نورو هېوادونو ته د افغانانو د ورتګ چاره يوځل بيا ګړندۍ کړې ده.
نيمروز د هېواد په سوېل لوېدځ کې د هېواد له هغه ولايتونو دى چې له ايران او پاکستان سره ګډه پوله لري او د نا قانونه ګډوالۍ د تګ راتګ په اصلي دروازه بدل شوى دى
