ترجمه : عبد الله صدیقي
اسلامي تاریخ له ډېرو قهرمانانو او باتورانو نه برخمن دی؛ په دې ډله کې ارطغرل بن سلیمان شاه هم ځانته یو مقام لري، دی څنګه شهرت ته ورسېد؟
تاریخ پوهان وایي: ارطغرل د خپل قوم د ۴۰۰ پر اس سپرو سره یو ځای د منځنۍ اسیا نه پس له هغه را ووت چې د مغلو او تاتاریانو د مقابلې نه عاجز شو، دوی په دې نیت منځني ختیز طرف ته روان وو، چې د خپلو ځانونو لپاره د اوسېدو یو مناسب ځای پیدا کړي. دوی دهمدې موخې د ترلاسه کولو لپاره روان وو، چې د یوه غره په لمنه کې یی د شور او ځوږ اوازونه ووارېدل، کله چې دوی ورته نږدې شول ویې لیدل چې ددو لښکرو تر منځ سخت جنګ روان دی او د جنګ میدان ښه ګرم دی، یو طرف ته یې ولیدل چې اسلامي بیروغونه رپیږي او بل طرف ته یې ولیدل چې صلیبي بیرغونه رپیږي.
ارطغرل فوراً خپلو شهسوارانو ته امر وکړ چې ځانونه د خپلو مسلمانانو وروڼو د کمک او مرستې لپاره تیار او اماده کړي او دوی دغه په جنګ کې ښکېل مسلمانان نه پیژندل چې څوک، د کوم ځای او د کوم قوم دي؟ او نه یې دا فکر وکړ چې زما ملګري به پکې فنا شي.
په دې جنګ کې صلیبي خوا د تجهیز او افرادو له درکه قوي او بر لاسي وو او مسلمانان په کمزوري حالت کې وو، د ارطغرل د امر سره سم دده ملګري جنګ خواته روان شول، په جنګ کې ښکیل مسلمانانو ددوی په لیدو هک پک حیران شول چې دا شهسواران دکوم ځای نه ناڅاپه ددوی مرستې ته را پیدا شول؟ د اسمان نه راښکته شول ؟ او که د زمکې نه را ووتل ؟ چې په صلیبو لښکرو لکه د توپان په شکل حمله شروع کړه!
د ارطغرل ملګرو په میدان کې د اتلانو په څېر وجنګیدل او په دې وتوانیدل چې د جنګ دمیدان اړخ د مسلمانانو په نفع را وڅرخوي او صلیبیانو ته ماتې ورکړي او اسلامي لښکر د امیر علاء الدین سلجوقي تر قیادت جنګ وګټي.
دا جنګ دعلاء الدین سلجوقي او دصلیبیانو تر منځ وشو او الله تعالی د ارطغرل په برکت مسلمانانو ته فتح ورکړه نو علاء الدین سلجوقي ددوی په دې مېړانه او ددوی په دې صفا عقیده ډېر زیات خوشحاله شو او ددوی نه یې مننه وکړه او ددوی د اوسیدو لپاره یی د اناضول غربي څنډې ( جنوبي ترکیه ) دوی ته ورکړه چې دوی پکې اباد شي، دغه علاقه د بیزنطي رومیانو ( صلیبیانو ) سره هم سرحده وه، چې یو طرف ته یې رومیان او ورسره بل طرف ته نوي اشغالګران مغلان پراته وو.
ارطغرل د امیر علاء الدین سلجوقي په خدمت کې همیشه کار کاوه او دمغلو او صلیبیانو سره یې هر وخت په سرحدونو کې جهاد کاوه، تر دې چې امیر علاء الدین سلجوقي د ۹۶ کالو په عمر وفات شو او بیا څه وخت پس خپله ارطغرل هم وفات شو او د هغه زوی عثمان بن ارطغرل په ټوله علاقه باندې امیر مقرر شو.
ددغې وړې علاقې منطقه نه چې علاء الدین سلجوقي دوی ته ورکړې وه، بیا په ټوله نړۍ کې یو زبرځواک دولت (عثمانی خلافت ) تاسیس او جوړ شو او د همدې اتل شهسوار او مجاهد د نسل نه دنړۍ قوي بادشاهانو (دعثمانی خلافت بادشاهانو) ۶۰۰ کاله داسلام بیرغ اوچت ساتلی و.
