(کابل ټکی کام ۱۳۹۶لړم ۲۰): نن سهار مهال د هلمند ولايت د ناوې ولسوالۍ په مربوطاتو کې د ملي اردو پر قرارګاه سرتيری موټربم بريد شوی، چې عسکرو ته يې درنه مرګ ژوبله اړولې ده.
د طالبانو له لوري کابل ټکی کام ته په رالېږلې خبرپاڼه کې راغلي، چې د غلجيانو په سيمه کې د دوی د يوه سرتيري بريدګر له لوري د اردو په يوه لويه قرارګاه د شوبلې په واسطه بريد شوی او لسګونه عسکرو ته يې مرګ ژوبله اړولې ده.
طالبان وايي، په دغه شوبله کې يې قوي منفجره مواد ځای پر ځای کړي و چې زياته سيمه يې تخريب کړې ده.
يوې سيمه ييزې امنيتي سرچينې د دغه بريد د تائيد تر څنګ وويل، چې عسکرو ته درنه مرګ ژوبله رسېدلې خو په اړه يې نور معلومات ورنکړل.
په پېښه کې د کره مرګ ژوبلې اوښتو په اړه به جزيات وروسته پر ليکه شي…
په داسې حال کې ننی بريد ترسره کېږي، چې تېره ورځ هم طالبانو د دغه ولايت د درېيمې امنيتي حوزې اړوند د بولان په سيمه کې د سرحدي ځواکونو پر دوهم کنډک موټربم سرتيری بريد وکړ، چې طالبان وايي په دغه بريد کې له ديرشو زيات عسکر وژل شوي، لسګونه نور ټپيان شول او دغه راز ټانګونه او رينجرې ويجاړې شوې.
په هلمند کې د درېيمې لوا قومندان ظاهرګل مقبول وويل، بریدګر په مازدا ډوله موټر کې چاودېدونکي توکي ځای پر ځای کړي وو او موټر یې د سرحدي ځواکونو د کنډک له لومړي قرول سره جنګولی او درنه مرګ ژوبله يې اړولې ده.
