ډاکټرانو د یوه کس له خیټې ۲۶۳ سِکې او ۱۰۰ مېخونه راایستلي

هندوستان کې ډاکټرانو د یوه کس له خیټې ۲۶۳ سِکې، ۱۰۰ مېخونه، د وېښتو خرېیلو چاړې (شېونګ بلیډز) او د ښيښو کوچنۍ ټوټې راایستلې دي.

د هند د مدهیه پردېش ریاست ۳۲ کلن اوسېدونکي، مقصودخان، له ۳ میاشتو راهیسې په خېټه کې له درده شکایت کاوه او روغتون ته ولاړ. لومړی ډاکټرانو ورته وویل چې درد د خرابو او زهرجنو خوړو له امله ورته پیدا شوی دی. خو د اینډواسکوپي ټیسټ له کولو وروسته ډاکټرانو ته د خیټې د درد اصلي لامل معلوم شو.

د اصلي لامل له معلومېدو وروسته ډاکټرانو د مقصود د خیټې عملیات وکړل – د مقصود خان له خېټې د ۷ کیلو ګرامو په وزن برابر شیان راووتل: ۱۰ یا ۱۲ د وېشتو خرېیلو چاړې، ۲۶۳ سکې، ۱۰۰ مېخونه او د ښیښو کوچنۍ ټوټې.

ډاکټران وايي چې د ناروغ محمد مقصود ذهني حالت سم نه دی او دا شیان یې له کورنۍ او ملګرو پټ تېرول، ”ځکه روغ کس هیڅکله داسې کار نه کوي.“

د مقصود خان خپلوان وايي، نوموړي ریکشه چلوله او د سپرلیو لخوا ورکړل شوې سکې به یې تېرولې. د خپلوانو په خبره یې، ښايي مقصود د ذهني خفګان یا ډپرېشن په وخت کې له اوسپنې جوړ شیان له اوبو سره تېرول.

ویل کېږي، له عملیاتو وروسته د مقصود روغتیايي حالت له خطرې وتلی دی او وعده یې کړې چې بیا به داسې شیان نه خوري.

سرچینه: THE SUN