په بریتانیا کې هم د امریکایي ولسمشر د پریکړې پرضد لاریونونه روان دي
(کابل ټکی کام ۱۳۹۶لیندۍ ۱۸ فرید افغان)
له تیرې ورځې راپدیخوا د نړۍ په مختلفو سیمو کې د امریکا د هغې پریکړې پرضد چې بیت المقدس یې رسما د اسرایلو د پلازمینې په توګه ومانه او هلته یې د خپل سفارت د انتقال اعلان وکړ، پراخ لاریونونه روان دي.
د لاریونونو دا لړۍ په اروپا کې د امریکا لوی متحد هیواد بریتانیا ته هم ورسیده.
د اناضول خبري اژانس د راپور تر مخه، زرګونه کسانو د لندن په ښار کې د امریکا د سفارت مخې ته راټول شوي و او د امریکا او اسرایلو پرضد یې شعارونه ورکول.
لاریونوالو له ځانونو سره شعاریز بینرونه لیږدول چې پکې د ‹‹قدس د فلسطین پلازمینه ده، آزاد فلسطین غواړو ›› کښل شوي و.
د یادونې وړ ده چې بریتانیا ویلي چې د امریکا دا اقدام د منلو نه دی او دوی به هیڅکله د قدس په مسئله کې د امریکا او اسرایلو لار تعقیب نه کړي.
په ترکیه کې هم زرګونو کسانو لوی لاریون رابللی و او د امریکا ضد شعارونه یې ورکول.
د یادونې وړ ده چې تیره ورځ د افغانستان په یو شمیر ولایاتو کې هم د امریکا د دې پریکړې پرضد پراخ لاریونونه وشول .
همداراز د نړۍ په مختلفو هیوادونو کې په میلونونو خلکو د سترو مظاهرو په ترڅ کې د امریکا دا اقدام په سختو ټکو وغانده
په عین حال کې د نیویارک ټایمز مجلې راپور ورکړی چې ټرمپ د‹‹شېلډن جي اېډېلسن›› په نامه یهودي ملیاردر او د خپل یهودي زوم جراد کوشنر تر سختو فشارونو لاندې دا طرحه اعلان کړه.
ټایمز لیکلي، یهودي ملیاردر د ټرمپ انتخاباتي کمپاین کې ۲۰ میلیون دالر لګولي و او د هيلاري كلنټن پر ضد په تبلیغاتي مصارفو یې ۲۵ ميليونه ډالره هم وركړي دي. چې د همغه احسان په بدله کې ټرمپ خپله وعده چې ټاکل شوې وه راروان پسرلي ته یې پوره کړي اوس عملي کړه.
