طالبانو د کندز د چارواکو ادعا رد کړه
(کابل ټکی کام، ۱۳۹۶، لیندۍ ۱۸) د کندز امنيتي مسئولين وايي، د دغه ولايت په امام صاحب ولسوالۍ کې يې د پامير ۱۴ عملياتو پر مهال ۳۱ طالبان وژلي او ځينې سيمې يې هم نيولي دي، خو طالبانو د چارواکو ادعا رد کړې ده.
د پامير ۲۰ فرقې وياند غلام حضرت کريمي پژواک ته ويلي، د پامير ۱۴ عملياتو پر مهال د امام صاحب ولسوالۍ کې د دوو قومندانانو په ګډون ۳۱ طالبان وژل شوي دي.
نوموړی وايي، په دې عملياتو کې يې له طالبانو څو سيمې او يوه اندازه وسلې هم نيولي دي.
د طالبان ويندوی ذبيح الله مجاهد په خپله رسمي ټويټرپاڼه په امام صاحب ولسوالۍ کې د ګڼو طالبانو او بهرنيو اطباعو د وژل کېدو اوازې رد کړي وايي: (موږ د دښمن دغه ادعا په کلکه ردوو) او يواځې درې طالبان وژل شوي دي.
د مجاهد په وینا، په تېرو دوو ورځو کې لس کمانډو عسکر وژل شوي، ګڼ شمير نور ټپيان دي، په خبره يې چې عملياتي قوې هيڅ پرمختګ نه دی کړی.
