(کابل ټکی کام، ۱۳۹۶، ۲۳) افغانستان ته يو ځل بيا د ولسمشر د لومړي مرستيال جنرال عبدالرشيد دوستم د راتګ مخه نيول شوی دی.
د روان کال په لومړيو کې پر جنرال دوستم د جوزجان د پخواني والي احمد ايشچي له لوري تور پورې شو، چې پر هغه يې جنسی تېری کړی او شکنجه کړی يې دی.
نوموړی دغه مهال په شمال کې و، خو کابل ته په راتګ د ولسمشر غني مېرمنې رولاغني د لندن ټايمز ورځپاڼې ته وويل، چې پر نوموړي قانون پلی شوی او په خپل کور کې نظربند دی او هيڅ رسمي دنده نه لري.
له هغې وروسته د جنرال دوستم رسمي سرچينو وويل، چې نوموړی د تداوۍ په موخه ترکيې هېواد ته تللی، خو د بېرته راتګ يې څو مياشتې پوره شوې چې لا هم هغه هېواد کې پاتې کېږي.
نوموړي په ترکيه کې د بلخ له والي عطا نور او د اجراييه رياست له دويم مرستيال محقق سره په ګډه د نجات افغانستان په نامه اييتلاف جوړ کړ، چې په افغانستان کې به يې اعلان کړي، خو څو مياشتې مخکې هېواد ته د دوستم د راتګ مخنيوی وشو، الوتکې ته يې په مزار هوايي ډګر د ناستې اجازه ورنه کړل شوه او لا هم دغه اييتلاف نه دی اعلان شوی.
اوس تازه ځينو باوري سرچينو پژواک ته ويلي، د ولسمشر لومړي مرستيال دوستم يو ځل بيا مزارشريف ته د راتګ هڅه کړی خو بريالی شوی نه دی.
سرچينه زياتوي، نوموړی په همدې موخه د ازبکستان هېواد ته تللی څو افغانستان ته راشي خو الوتنه يې د ناڅرګندو دلايلو له امله ځنډېدلې ده.
د سرچينې په وينا، جنرال دوستم اوس مهال په ازبکستان کې دی او د هېواد شمال ته د راتلو هڅه کوي.
له بله پلوه د جنبش ګوند وياند دغه څرګندونې رد کړي دي.
