کندهار: د میوند ولسوالۍ پر مرکز د موټربم سرتیری برید شوی
(کابل ټکی کام ۱۳۹۶ جدي ۱ فرید افغان)
د کندهار ځایي دولتي چارواکو رسنیو ته ویلي چې نن سهار ۵ بجې د میوند ولسوالۍ په امنیه قوماندانۍ په دوهم قراول کې د هاموي ټانګ په توسط لوی موټر بم برید شوی دی.
ځایي چارواکي په برید کې د ۶ پوليس د وژلو او د ۸ تنو نورو نورو دټپي کیدو خبر ورکوي.
خو نورو امنیتي سرچینو بیا رسنیو ته ویلي؛ چې د دوی لومړني معلومات ښیي چې په دې برید کې ۷ پولیس وژل شوي او ۹ نور ژوبل دي.
برید له افغان پوځیانو څخه د نیول شوي هاموي موټر په وسیله شوی او یوې امنیتی سرچینې ویلي، چې زرگونه کیلو گرامه چاودیدونکي توکي په کې ځای پر ځای شوي وو.
طالب ویاند قاري یوسف احمدي د برید پړه منلې او ویلي یې دي چې برید یې دهاموي ټانګ په توسط د دې ولسوالۍ په قطعه منتظره ترسره کړی دی .
طالبانو په برید کې ګڼو عسکرو ته د مرګ ژوبلې اړولو ادعا کړې .
برید داسې مهال ترسره شوی چې په یاده قطعه کې د حاجي کاکا په نامه د پولیسو یو قوماندان هم موجود و، راپورونه وایي چې نوموړی په برید کې سخت ټپي شوی دی.
