غزني: د جاغوري ولسوالۍ ته ښځینه څارنواله ټاکل شوې

(کابل ټکی کام ۱۳۹۶ مرغومی ۶ فرید افغان)

د غزني سیمیزو چارواکو رسنیو ته ویلي چې د لومړي ځل لپاره دجاغوري ولسوالۍ ته د‹‹ رحیمه طوفان›› په نامه څارنواله ټاکل شوې ده.
د جاغوري ولسوال ظفر شریف رسنیو ته ویلي چې ښځو ته باید په کم نظر ونه کتل شي ځکه دوی هم کولی شي چې د سړیو ترڅنګ ګډ کار وکړي.
که څه هم اسلام ښځو ته اجازه نه ده ورکړې چې په قضایي چارو کې دنده ترسره کړي خو د افغانستان په اساسي قانون کې د سړیو په څیر یو ډول حق ورکړل شوی.
رحیمې په ایران هیواد کې د حقوقو ماسټري اخیستې او ژمنه یې کړې چې خپله دنده په ښه توګه مخته وړي
د لویې څارنوالۍ د شمیرو له مخې دا مهال په افغانستان کې نیږدې ۲۵۰۰څارنوالان شته چې۱۷ فیصده یې ښځینه څارنوالانې دي.
د یادونې وړ ده چې د کابل په ګډون د افغانستان په ټولو ولایتونو کې د ښځو پر وړاندې د تاوتریخوالي پر ضد ۴۳ څارنوالانې کار کوي.

افغان حکومت او نړیواله ټولنه په ټول توان سره هڅه کوي ترڅو ښځې وهڅوي چې په مهمو دولتي ادارو کې دندې ترسره کړي